„მემგონი ხელისუფლების არასაყვარელმა არხმა შეცვალა სტილი. „რუსთავი 2“-ის რეიტინგები ახლოს იყო ობიექტურობასთან. შესაძლოა „რუსთავი 2“-მა გადაწყვიტა იცავდეს რომელიმე პოლიტიკური პარტიის ინტერესებს, ოღონდ რეალობის დამახინჯების გარეშე. ეს გადაწყვეტილება მხოლოდ მისასალმებელი იქნება“ , – თვითმმართველობის არჩევნების წინასწარი შედეგების შესახებ პოლიტოლოგმა რამაზ საყვარელიძემ „ტვ პირველის“ საარჩევნო ეთერში ისაუბრა.
„მე ველოდი,რომ ყველაფერი პირველ ტურში დასრულდებოდა. ოპოზიცია დეკლარირებას აკეთებს,რომ გაყალბდა არჩევნები და იყო დარღვევები, სამოქალაქო სექტორი აღნიშნავს,რომ კატასტროფული დარღვევები არ ყოფილა, ცესკოს საჩივრებიც მეტნაკლებად ტექნიკური ხასიათისაა. ამიტომ მთლიანი სურათის გაყალბებაში ოპოზიციას დამაჯერებლობა აკლია.
მოსახლეობა მათ არ დაუჯერებს, სიმშვიდის განცდა აქვთ. თუ მათ არ დაიჯერეს, დარღვევებით აღშფოთებულ ოპოზიციას არავინ აყვება და მათთვის რეიტინგის დაკარგვა იქნება. ჯობს იმაზე დაფიქრდნენ,რომ დაბალი რეიტინგი აქვთ. კიდევ უფრო დაიკლებს თუ შეუსაბამობა იქნება მათ ნათქვამსა და ადამიანების გრძნობებს შორის.
მიუხედავად იმისა,რომ ივანიშვილი არც გამოჩენილა და კომენტარიც არ გაუკეთებია, სანამ „ქართული ოცნება“ ხელისუფლებაში იქნება, ყველა მათი წარმატება ივანიშვილის დამსახურებაა. მან დაბადა ეს გუნდი, შესაძლოა მშობელმა ხმა არ ამოიღოს, მაგრამ შვილის წარმატება მას მიეწერება ხოლმე“, – განაცხადა რამაზ საყვარელიძემ.
მანანა ღოღობერიძე
