“მართვის მოწმობის სახეცვლილი გამოცდა 2018 წლის პირველი ნახევრიდან ამოქმედდება” – ამის შესახებ „თბილისი თაიმსს“ შინაგან საქმეთა სამინისტროს მომსახურების სააგენტოში განუცხადეს.
კონკრეტულად რა ცვლილებებია მოსალოდნელი მართვის მოწმობის წესის გაცემასთან დაკავშირებით, უწყებაში არ აკონკრეტებენ. თუმცა, ამბობენ, რომ ამ ეტაპზე დასრულებულია პროექტირების სამუშაო და მიმდინარეობს განხორციელებისთვის მოსამზადებელი სამუშაოები.
„ევროდირექტივით აღებული ვალდებულების იმპლემენტაციის მიზნით, შინაგან საქმეთა სამინისტროს მომსახურების სააგენტო აქტიურად მუშაობს მართვის მოწმობის პრაქტიკული გამოცდის რეალურ პირობებში ჩატარების პროექტზე. დეტალურად იქნა შესწავლილი როგორც ევროკავშირის ქვეყნების გამოცდილება, ისე სხვა განვითარებული ქვეყნების პრაქტიკა. გამოცდილების გაზიარების მიზნით, აქტიურად ვთანამშრომლობთ ასევე სხვადასხვა საერთაშორისო ორგანიზაციასთან. ამ ეტაპზე პროექტირების სამუშაო დასრულებულია და მიმდინარეობს განხორციელებისთვის მოსამზადებელი სამუშაოები. მართვის მოწმობის სახეცვლილი გამოცდა 2018 წლის პირველი ნახევრიდან ამოქმედდება.“ – შინაგან საქმეთა სამინისტროს მომსახურების სააგენტო.
ნინი ზარიძე
