დღეის მდგომარეობით, რთველის ფარგლებში, კერძო კომპანიებმა 49 000 ტონა ყურძენი უკვე ჩაიბარეს, – ამის შესახებ ჟურნალისტებს მთავრობის დღევანდელი სხდომის დასრულების შემდეგ სოფლის მეურნეობის მინისტრმა შალვა ფიფიამ განუცხადა.
მისივე განმარტებით, ყურძენს 67 კერძო კომპანია იბარებს.
“რთველი აქტიურ ფაზაშია შესული. კერძო კომპანიების მხრიდან ძალიან დიდი ინტერესი არსებობს, 67 კერძო კომპანია იბარებს ყურძენს და დღეის მდგომარეობით, უკვე 49 000 ტონა ყურძენია ჩაბარებული. ყოველდღიურად დაახლოებით 4 000-დან 4 500 ტონამდე ყურძნის ჩაბარება ხდება”, – განაცხადა შალვა ფიფიამ.
მისივე შეფასებით, კარგად იმუშავა შეღავათიანი აგროკრედიტის მეხუთე კომპონენტმა, რომლის ფარგლებშიც კომპანიებისთვის უკვე 42 მილიონ ლარზე მეტია გამოყოფილი.
“ჩვენ გვაქვს მოლოდინი, რომ რთველი წარმატებით ჩაივლის და ის რამდენიმე კვირაში დასრულდება”, – აღნიშნა სოფლის მეურნეობის მინისტრმა.
როგორც ცნობილია, ღვინის ეროვნულ სააგენტოს და სოფლის მეურნეობის სამინისტროს 22 აგვისტოდან ადგილზე მუდმივმოქმედი წარმომადგენლობა ჰყავს მივლენილი.
19.09.13
