გორის ბავშვთა კვების საკონსერვო ქარხანა “კულა” სამი წელია არსებობს და დაახლოებით, 250 დასახელების პროდუქტს აწარმოებს. კომპანიამ წარმოება თავიდან წვენებით დაიწყო, შემდეგ მათ მიერ წარმოებულ პროდუქციას დაემატა ტყემლები, ჯემები, მწნილები, ასევე ხილის კომპოტები და მიმდინარე ლიმონათიც გამოუშვებს. „კულა“ ქართულ ბაზარზს კვლავ სიახლეს სთავაზობს და არსებული პროდუქციის გარდა უკვე ხორცის კონსერვებსაც შესთავაზებს.
ადგილზე აწარმოებენ არამხოლოდ კლასიკურ ხორცის კონსერვს, არამედ ქართული ტრადიციული კერძების კონსერვებს, როგორიცაა – ჩაქაფული, ჩაშუშული, ყაურმა. როგორც კომპანიის ხელმძღვანელი, ვანო გოგლიძე აღნიშნავს, მოგვიანებით წარმოებას დაემატება სხვადასხვა სახეობის პაშტეტი.
„უკვე ავიღეთ აკრედიტაცია ახალი საწარმოსთვის, რომელიც გამოუშვებს რამდენიმე სახეობის ხორცის კონსერვს. საწყის ეტაპზე უკვე დამზადებულია ისეთი ქართული ტრადიციული კერძები, როგორებიცაა, ჩაქაფული, ბულაღმა, ჩაშუშული, ტოლმა. ასევე თევზის კონსერვები. საწარმოს სიმძლავრეებიდან გამომდინარე 2 ცვლის შემთხვევაში 10-დან 14 ტონამდე დაკონსერვებული პროდუქციის გამოშვებაა შესაძლებელი. სამომავლოდ ვგეგმავთ დავამატოთ კერძები.“
ადგილზე 40-მდე ადამიანი დასაქმდება. კომპანია ნედლეულს ადგილობრივებისგან ჩაიბარებს.წარმოებაში უკვე ჩადებულია 1,5 მილიონი დოლარის ინვესტიცია და სამომავლოდ დაახლოებით კიდევ ნახევარი მილიონი დოლარის დამატება იგეგმება.
“კულამ” ცოტა ხნის წილ ექსპლუატაციაში გაუშვა ასევე კომპოტების ახალი საწარმო, რომლის წარმადობა ერთი საათის განმავლობაში 4 000 ცალია.
შეგახსენებთ გორის საკონსერვო ქარხანაში წარმოებული პროდუქცია ადგილობრივი ბაზრის გარდა მსოფლიოს 45 ქვეყანაში იყიდება.
მარიამ ლეკიაშვილი