ნინო ბურჯანაძის მოსკოვში ვიზიტის შესახებ და ოკუპაციაზე მისი საჯარო განცხადებებისას დაშვებულ შეცდომებზე, სამხედრო საკითხების ანალიტიკოსმა ამირან სალუქვაძემ „ტვ პირველზე“, გადაცემა „რეაქციის“ ეთერში ისაუბრა.
„ქვეყნის შიგნით შესაძლოა ბევრ რამეზე ვისაუბროთ ღიად, მაგრამ წამგებიანია საერთაშორისო არენაზე ომის დაწყებაზე ცალმხრივად დადანაშაულება. ომი თუ დავიწყეთ, ესეიგი ჩვენ ვართ დამნაშავე. 7 აგვისტოს 23:30 წუთზე არ დაწყებულა ომი, ეს გაცილებით შორიდან იწყება. პრობლემა არ არის,რომ ღიად ვისაუბროთ დაშვებულ შეცდომებზე, უბრალოდ ეს იყო ცალმხრივი. ეს არის მცდელობა, რომ პრორუსული მხარდაჭერა გაძლიერდეს საქართველოში. ნინო ბურჯანაძეს არ უსაუბრია რუსულ შეცდომებზე, სიბოროტეზე, გამოიყენონ ეს 150 მილიონიანი ტრიბუნა და თქვან სიმართლე.
მე ვარ მომხრე რუსეთთან დიალოგის, იაპონიასაც აქვს ახლო და მჭიდრო ურთიერთობები. მოყვარეს არ სჭირდება დიალოგი, მტერს ზუსტად უნდა ელაპარაკო. რაც შეეხება გადაცემებში მონაწილეობას, არც მაგაში ვხედავ ცუდს არაფერს, მეც რომ დამიძახონ, მივალ და ვილაპარაკებ. ბოლო წლებში ვაკვირდებოდი რუსულ მედიას და კარგად ვიცი,რომ ბოლო ერთი წლის განმავლობაში ფაქტობრივად ყველა გადაცემა ეძღვნება უკრაინას. ერთ მხარეს დგანან უკრაინელი, მეორე მხარეს რუსი ექსპერტები. უბრალოდ ჩემთვის მიუღებელი იყო უკრაინის საწინააღმდეგო ბარიერზე დგომა. უკრაინა ჩვენი პარტნიორი და მეგობარი სახელმწიფოა. თუმცა, ნინო ბურჯანაძეს მოვუწონე ჟესტი,რომ ჟირინოვსკისთან გაცვალა ადგილი და აფხაზის გვერდით დადგა. 1993 წლიდან რუსები არ გვალაპარაკებენ აფხაზებთან“ , – განაცხადა ამირან სალუქვაძემ.
მანანა ღოღობერიძე
