„ახალი მერი აკეთებს არჩევანს, გუნდს გადაახალისებს და ნდობას გამოუცხადებს ახალ ადამიანებს, გამორიცხული არ არის ასევე ძველი გუნდიდანაც აირჩიოს სანდო ადამიანები“ , – ამის შესახებ თბილისის ყოფილმა მერმა დავით ნარმანიამ „იმედზე“, გადაცემა „ქრონიკის“ ეთერში ისაუბრა.
„არ მესმის რატომ ამბობენ,რომ დავით ნარმანიასთან ერთად მთელი გუნდი მიდის მერიიდან. კანონმდებლობით, როდესაც თბილისის მერს უწყდება უფლებამოსილება, მთელ მთავრობას უჩერდება მასთან ერთად, მოადგილეებს,სამსახურის ხელმძღვანელებს და გამგებლებს. ჯობს საზოგადოებამ შეაფასოს რა ჰგონიათ მერის მთავარი შეცდომა. მე ვთვლი,რომ გამოუსწორებელი შეცდომა არ მქონია. ის,რომ ჩემს მიერ დაშვებული შეცდომის გამო რამე გაფუჭდა ან ზიანი მიადგა ვინმეს, ასეთი რამ არ მახსენდება.ჩვენი გაკეთებლი პროექტები არამგონია ვინმემ არასათანადოდ შეაფასოს. ფასადურად არაფერი გაგვიკეთებია, რესურსები ტყუილად არ დაგვიხარჯავს.
ჩვენზე გაცილებით დიდი რესურსის მქონე ქალაქებიც უჩივიან იმას,რომ ბევრი რამ კიდევ მოუწესრიგებელია და ამაზე იყო აქცენტი ახალი მერის მხრიდან.რაც შეეხება აუდიტის შემოყვანას, ამაში ცუდი და უხერხული არაფერია. ახალ მერს სურს გამოასწოროს ხარვეზები თუ რამე იყო. ჩემმა გუნდმა იმუშავა საკმაოდ ეფექტიანად. ჩვენ ყველაფერს ვაკეთებდით ფუნდამენტურად, მათ შორის გამორჩეულია ნუცუბიძის, პეკინის, ბარნოვის ქუჩა. თავშივე დიდი რესურსი დავხარჯეთ რომ უფრო გრძელვადიან მოხმარებაზე ყოფილიყო გათვლილი. არასრულ 4 წელში გვინდოდა შეგვესრულებინა ყველა დაპირება.
მე რეალურად ცუდი მემკვიდრეობა დამხვდა, ეს იყო დარღვეული ბიუჯეტი, საბოტაჟი, რამდენიმე თვეში თავს დაგვატყდა სტიქია და მხოლოდ ამის შემდეგ დავიწყეთ რეალურად საქმის კეთება. პროექტები,რომლითაც ვამაყობ ბოლო 2 წელშია გაკეთებული. ახალ მერს საბოტაჟი და დარღვეული ბიუჯეტი არ ხვდება, მას ბევრი მოწესრიგებული მიმართულება ხვდება და შეუძლია უფრო აქტიურად იმუშაოს“ , – განაცხადა დავით ნარმანიამ.
