„ყველაფერი საჯარო მმართველობის რეფორმით დაიწყო, ინტენსიური დისკუსიები გვქონდა, თუ როგორ გავხადოთ ჩვენი მმართველობა ეფექტური და დავზოგოთ თანხები. პროცესში ბევრი ადამიანი იყო ჩართული. ცვლილებებზე მუშაობა დიდი ხანია მიმდინარეობდა, ეს არ იყო დღეები“ , – სამთავრობო ცვლილებების შესახებ და გადაწყვეტილებების მიღების პროცესზე მთავრობის ადმინისტრაციის უფროსმა მაია ცქიტიშვილმა საზოგადოებრივ მაუწყებელზე, გადაცემაში „კვირის ინტერვიუ“ ისაუბრა.
„ნებისმიერ სისტემაში დგება მომენტი,როცა მასშტაბური ცვლილებები უნდა მოხდეს, ამას საზოგადოებაც ითხოვდა. ყველა გადაწყვეტილება გუნდის ჩართულობით მიიღება, საპარლამენტო უმრავლესობამაც იცოდა ამის შესახებ, ეს არავისთვის იყო სიურპრიზი.ეს არ არის არაპოპულარული ნაბიჯი, არჩევნებამდეც შეიძლებოდა განხორციელება. უბრალოდ ყველაფერს აქვს თავისი ეტაპი. ჩვენ მხოლოდ პოპულიზმის ელფერის შემცველ გადაწყვეტილებებს არ ვიღებთ.
საბიუჯეტო სახსრების ოპტიმიზაციაზე მსჯელობა კიდევ მიმდინარეობს. თუმცა, ხარჯები არ არის პრიორიტეტი. პირველ რიგში ეს არის გადაწყვეტილებები,რომლებიც სისტემის ეფექტურობას უზრუნველყოფს. არც ერთ ამ ცვლილებაში არ იგულისხმება რომელიმე სამინისტროს ფუნქციის დაკარგვა. არასოდეს ყოფილა საუბარი, რომ რომელიმე უწყება გაქრებოდა.
გარემოს დაცვის და სოფლის მეურნეობის სამინისტროს გაერთიანება მნიშვნელოვანია და არ ნიშნავს,რომ ერთი მინისტრი ვერ შეძლებს ორივე უწყების მართვას. გარემოს დაცვის სამინისტროს ასევე ჩაბარებული ჰქონდა ბუნებრივი რესურსების მართვა. ტყის ფონდის მართვის ნაწილში გარემოს დაცვა გასცემდა ლიცენზიებს ტყით სარგებლობაზე. სოფლის მეურნებოა ხელს უწყობდა ამ პროცესს და ერთობლივად მუშაობდნენ. იგივე ხდებოდა თევზჭერის ლიცენზიებსა და მეთევზეობის განვითარებაზე“ , – განაცხადა მაია ცქიტიშვილმა.
მანანა ღოღობერიძე