„ოპტიმიზაციის კუთხით რეორგანიზაცია მისაღებია, ერთადერთი არ ვეთანხმებით გარემოს დაცვის სამინისტროს გაერთიანებას ნებისმიერ სამინისტროსთან, თუნდაც ეს იყოს ეკონომიკის სამინისტრო“, – გარემოს დაცვის სამინისტროს დამოუკიდებელ უწყებად ჩამოყალიბების მნიშვნელობის შესახებ პარლამენტის გარემოს დაცვის კომიტეტის თავმჯდომარემ, კახა კუჭავამ „იმედის“ ეთერში, გადაცემა „ქრონიკასთან“ ინტერვიუში ისაუბრა.
„კომიტეტის პოზიციაა, რომ არა თუ ცალკე იყოს, კიდევ უფრო გაძლიერდეს გარემოს დაცვის უწყება და ბიუჯეტი გაიზარდოს. მნიშვნელოვანია იდგეს ცალკე, რადგან მან სრულად მოახერხოს ფუნქციების შესრულება და გამოწვევებთან გამკლავება. ჩემი პირადი პოზიცია არის საპარლამენტო უმრავლესობის უმრავლესობაში. თითქმის ყველა დეპუტატი მეთანხმება, მათ აქვთ შენიშვნა სტრუქტურულ ცვლილებებში და ეს ეხება გარემოს დაცვის სამინისტროს შერწყმას.
მსგავსი მაგალითები არსებობს,სადაც გარემოს დაცვა გაერთიანებულია სხვა უწყებებთან, თუმცა ამ ქვეყნებში გარემოს დაცვის მაღალი სტანდარტები არსებობს, სისტემა გამართულად მუშაობს. ამ შემთხვევაში თვითმმართველობებს აქვთ გადამწყვეტი მნიშვნელობა თუ რამდენად მზად არიან ებრძოლონ გამოწვევებს. ჩვენი აზრით საქართველოში დღეს არსებული გამოწვევების ფონზე არ იქნება მიზანშეწონილი გარემოს დაცვის სხვა სისტემასთან გაერთიანება.
პორტუგალიამ სოფლის მეურნეობის და გარემოს დაცვის სამინისტროები რამდენიმე წლის წინ გააერთიანა და წელს უკვე გარემოს დაცვა ცალკე დააბრუნა, თან აღიარა,რომ ეს გადაწყვეტილება შეცდომა იყო. „ნაციონალური მოძრაობის“ დროს იყო შეცდომა, რომ ეს დარგი პრიორიტეტად არ დააყენეს, მათ შორის ეკონომიკური კუთხით“ , – განაცხადა კახა კუჭავამ.
მანანა ღოღობერიძე