სამთავრობო ცვლილებებთან ერთად პარლამენტში კანონპროექტი შევიდა, რომლის თანახმად, სახელმწიფო უსაფრთხოების სამსახურის თანამშრომლებს შეუძლიათ, დაიწყონ მუშაობა კერძო და სახელმწიფო სტრუქტურებში ისე, რომ პარალელურად სუს-ში მუშაობა გააგრძელონ. მათ არ დაევალებათ, რომ სუს-ის თანამშრომლობა გაამხილონ.ამ საკითხის შესახებ ახალგაზრდა იურისტთა ასოციაციის თავმჯდომარემ, ანა ნაცვლიშვილმა „იბერიას“ ეთერში, გადაცემაში „ცენზურის გარეშე“ ისაუბრა.
„სამთავრობო ცვლილებები განიხილება დაჩქარებული წესით, ეს სერიოზული პრობლემაა. დიდია შანსი,რომ მნიშვნელოვან საკითხებზე გადაწყვეტილება მიიღონ დისკუსიების და ღრმა ანალიზის გარეშე. კანონპროექტების წერისას არის დაბალი სტანდარტის დასაბუთებები. პასუხი არ არის გაცემული ყველაზე კრიტიკულ საკითხებზე, თუ რა კვლევას ეფუძნება ეს ცვლილება. მაგალითად სამთავრობო დოკუმენტის უკან ამბობენ,რომ დგას ანალიზის დოკუმენტი, რაც საჯაროდ ხელმისაწვდომი არ არის. არ ვიცი რატომ ხდება პროცესების დაჩქარება, ეს მინიმუმ არაპროფესიონალიზმის მაჩვენებელია. ასეთ პირობებში დიდია რისკი,რომ კარგი მოტივაციითაც კი მივიღოთ ცუდი კანონპროექტი.
რაც შეეხება ე.წ ოდეერის ინსტიტუტებს, პოსტსაბჭოთა ქვეყანა ვართ და ამიტომ განსაკუთრებით კარგად ვიცით რა როლი ჰქონდა უშიშროების სამსახურის წარმომადგენლებს ადამიანებზე გავლენის მოხდენის კუთხით. ახლო წარსულიდანაც გვახსოვს კადრები, ჩანაწერები, ადამიანების კონტროლი. სასამართლოს და პარლამენტის მხრიდან ეფექტური კონტროლი უსაფრთხოების სამსახურებზე არ არსებობს. ნებისმიერი ცვლილება,რომელიც გაზრდის ამ სამსახურების უფლებამოსილებას, გაცილებით უფრო სარისკოა. ღრმავდება ეჭვები,რომ არ ვიცით ვინ იღებს გარანტიას, რომ პრაქტიკა მიჰყვება კანონს“ , – განაცხადა ანა ნაცვლიშვილმა.
მანანა ღოღობერიძე
