„როგორც მხარე ჩვენ კმაყოფილი ვართ , გავასაჩივრეთ პალატის გადაწყვეტილება,რადგან არაფერი იყო ნათქვამი, იყო თუ არა მერაბიშვილის დაკავება კანონიერი, იყო თუ არა სისხლისსამართლებრივი დევნა პოლიტიკური შეფერილობის“ , – ვანო მერაბიშვილის საქმეზე სტრასბურგის სასამართლოს გადაწყვეტილების შესახებ იუსტიციის მინისტრმა, თეა წულუკიანმა „ტვ პირველზე“, გადაცემაში „დიანა ტრაპაიძის დღის ამბები“ ისაუბრა.
„გასაჩივრების შემდეგ დიდმა პალატამ ცალკე დასაბუთებით განიხილა იყო თუ არა პოლიტიკური შეფერილობა და განაცხადა,რომ არ არსებობს საკმარისი არგუმენტები, თითქოს წინასწარი პატიმრობა მიზნად ისახავდა მერაბიშვილის პოლიტიკიდან ჩამოშორებას, ამიტომ გვაქვს კმაყოფილების საფუძველი. წერტილი დაესვა სპეკულირებას, თითქოს მერაბიშვილი პოლიტიკური ნიშნით იყო პატიმრობაში და არა იმიტომ,რომ ჩაიდინა რამე დანაშაული. ამაზე უკვე არა მხოლოდ „ქართული ოცნების“ ხელისუფლება, დიდი პალატაც ისაუბრებს, რომ არაფერი პოლიტიკური არ იყო. ეს არის მთავარი ჩვენთვის, როგორც მხარისთვის. ასევე მნიშვნელოვანია, რომ დიდმა პალატამ დაადასტურა წინა პალატის გადაწყვეტილება,რომ წინასწარი პატიმრობა იყო კანონიერი.
რაც შეეხება საკნიდან გაყვანის ეპიზოდს, გადაწყვეტილებაში ნათქვამია,რომ პალატას პატიმრის მონათხრობის უფრო სჯეროდა, რადგან ასევე ითვალისწინებდა სხვა პატიმრების მონათხრობს, თითქოს მათ დაინახეს. აქ ხმები გაიყო და რეალურად ერთმა ხმამ გადაწონა გადაწყვეტილება. 9 მოსამართლემ 8-ის წინააღმდეგ მიიჩნია,რომ მერაბიშვილის მონათხრობი იყო სარწმუნო. მიუხედავად იმისა,რა დაადგინა სტრასბურგმა, ჩემთვის უფრო მნიშვნელოვანია გამოძიების პასუხი, პროკურატურამ ვერ დაადგინა, რომ მერაბიშვილი საკნიდან იყო გაყვანილი“ , – განაცხადა თეა წულუკიანმა.
მანანა ღოღბერიძე
