„ტერორიზმი 21-ე საუკუნის გამოწვევაა, მათ შორის მეგასახელმწიფოებისთვისაც და მას საზღვრები არ გააჩნია. მარტივად არ დგას საკითხი,რომ ასპროცენტიანი გარანტია იყოს საზღვარზე“ , – ქვეყანაში აჰმედ ჩატაევის,როგორც განსაკუთრებულად საშიში ტერორისტის შემოსვლის შესახებ პარლამენტის თავდაცვისა და უშიშროების კომიტეტის თავმჯდომარემ, ირაკლი სესიაშვილმა „იმედზე“, გადაცემა „ქრონიკის“ ეთერში ისაუბრა.
„საქართველო პარტნიორებთან ერთად ყველაფერს აკეთებს იმისთვის,რომ გაძლიერდეს კონტრდაზვერვაც და შიდა უსაფრთხოებაც. ღიად ვერ ვისაუბრებთ როგორ მუშაობენ სპეცსამსახურები, მაგრამ სუს-ის ეფექტური მუშაობის შედეგია ის,რომ წლების განმავლობაში საქართველო ტერორიზმის მხრივ დაცული იყო. მითუმეტეს, რომ ოკუპირებული ტერიტორიების საზღვრები არის ძალიან მოწყვლადი და ამ მხრივ რთულია კონტროლი.ყველას გვესმის,რომ ამ უხილავ მტერს საზღვრები არ აქვს.
ასევე გასათვალისწინებელია ჩვენი ქვეყნის რელიეფიც და ის,რომ საქართველოს 1500-კილომეტრიანი საზღვარი აქვს. საზღვრის უკანონო კვეთა სერიოზული პრობლემაა აშშ-ისთვის და ევროპის წამყვანი სახელმწიფოებისთვისაც. პირველ რიგში უნდა დადგინდეს როგორ მოხვდნენ ეს ადამიანები ჩვენს ტერიტორიაზე, რა იყო მიზეზი და შესაძლო იყო თუ არა მათი შემოსვლის თავიდან აცილება.
აჰმედ ჩატაევი 2012 წელს არც ქართულ ოცნებას გაუთავისუფლებია და არც რომელიმე პოლიტიკურ გუნდს, არ არსებობდა მტკიცებულებები. ის 6 დღის განმავლობაში ხელებით მიცოცავდა,რომ სიცოცხლე შეენარჩუნებინა, ის ბუნებრივია ვერ იქნებოდა შეიარაღებული. როდესაც პროკურატურამ გააგრძელა მუშაობა, მოწმეებმა დაადასტურეს,რომ მას იარაღი არ ჰქონდა. ამიტომ სასამართლოს არ ჰქონდა ჩატაევის უკანონოდ პატიმრობაში დატოვების უფლება“ , – განაცხადა ირაკლი სესიაშვილმა.
მანანა ღოღობერიძე
