„ამ ეტაპზე არ მჯერა და არც მაქვს იმის ფიქრის საფუძველი,რომ ეს სახელმწიფოებრივ დონეზე გადაწყვეტილი შემოშვება იყო, თუმცა მჯერა,რომ შს სისტემაში საშუალო ან დაბალ დონეზე არსებობდნენ მფარველები“, – აჰმედ ჩატაევის საქართველოში ექსტრადირების, მისი მოღვაწეობის და დაპატიმრების ქრონოლოგიაზე „ნაციონალური მოძრაობის“ წევრმა, გივი თარგამაძემ „ტვ პირველზე“, გადაცემა „პირველების“ ეთერში ისაუბრა.
„სუს-ის და შს მინისტრის განცხადებით არაფერი ახალი არ გაგვიგია. ლიკვიდირებული რომ აჰმედ ჩატაევი იყო დიდი ხანია ცნობილია, ისიც ვიცოდით,რომ თავისთავად არალეგალური გზით შემოვიდა. ის ვერ მივიდოდა საზღვარზე და ვერ იტყოდა,რომ გამარჯობა მე აჰმედ ჩატაევი ვარ. ისიც ვერ გავიგეთ სასაზღვრე პუნქტი გაიარეს თუ ე.წ მწვანე ველიდან შემოვიდნენ. ამ ქვეყნის მოქალაქეთა დაცვა იწყება საზღვრის დაცვიდან და ხვრელების ამოქოლვიდან.
როდესაც ჩატაევი დააკავეს უკრაინაში, ის არ იყო იმდენად საშიში და საერთაშორისო ტერორიზმში არ იყო ჩართული, მას არ ჰქონდა აფეთქებული სტამბოლის აეროპორტი. უკრაინის ხელისუფლებას ჰქონდა ორი არჩევანი, ან რუსეთში უნდა მომხდარიყო ექსტრადირება, ან მოეძებნა სხვა გზა. იმ პერიოდში საქართველოს ხელისუფლება აწარმოებდა ყველაზე გონიერ პოლიტიკას კავკასიელ ხალხთან, ზოგადად დიალოგის წარმოების საშუალება გაჩნდა.
ამ პრინციპით ჩამოყალიბებული იყო პოზიცია,რომ პუტინთან და კადიროვთან მებრძოლი ადამიანების რუსული მხარისთვის გადაცემა არ უნდა მომხდარიყო. ამიტომ 2 ქვეყნის სპეცსამსახურების შეთანხმებით, ჩატაევის ექსტრადირება გადაწყდა საქართველოში. ამის შემდეგ თავად ჩატაევმა გამოთქვა ხელისუფლებასთან თანამშრომლობის სურვილი“ , – განაცხადა გივი თარგამაძემ.
მანანა ღოღობერიძე
