„რაც დღეს ვნახეთ არის კანონის ბრძოლა კრიმინალთან, სოციალური სამართლიანობის ბრძოლა ოლიგარქიულ ეკონომიკასთან, ეს არის თავისუფლების ბრძოლა ფარულ დიქტატურასთან,რომელსაც ხან სუვერენული დემოკრატია ჰქვია, ხან გასაოცარი დემოკრატია“ , – კიევში მიხეილ სააკაშვილის დაკავების და შემდეგ მხარდამჭერების მიერ მისი დემონსტრაციულად განთავისუფლების შესახებ „ნაციონალური მოძრაობის“ წევრმა გრიგოლ ვაშაძემ „რუსთავი 2“-ზე, გადაცემა „არჩევანის“ ეთერში ისაუბრა.
„რაც დღეს ვნახეთ არის 1989 წელს დაწყებული პროცესის გაგრძელება, როდესაც აღმოსავლეთ ევროპაში რევოლუციები დაუპირისპირდა ერთი მხრივ კოლონიალურ მმართველობას და მეორე მხრივ სოციალურ-ეკონომიკურ უსამართლობას. ევროპასთან სიახლოვის გამო აღმოსავლეთ ევროპის ბევრ ქვეყანაში ამ პროცესმა უმტკივნეულოდ ჩაიარა, ხოლო საქართველოს და უკრაინას გაცილებით დიდი დრო დასჭირდა.
არ ვიცი მიხეილ სააკაშვილის ნიჭია, ინსტინქტი თუ ბედი,რომ ყოველთვის ბრძოლის წინა ხაზზე დგას. მასში არის პერსონიფიცირებული რევოლუცია,რომელიც აუცილებლად გაგრძელდება საქართველოშიც. არავითარ შემთხვევაში კანონმდებლობის გარეთ არ გავალთ, აუცილებლად ვიხილავთ რეფორმების მეორე ტალღას და ოლიგარქიული მმართველობის დასამარებას.
სამართალდამცავი ორგანოები აღარ ასრულებენ ხელისუფლების დაკვეთებს. ეს ნანახი გვაქვს ჩეხოსლოვაკიაში, პოლონეთში 1981 წელს,როდესაც არმიის უდიდესმა ნაწილმა გადაიფიქრა მუშებზე სროლა. ის რაც დღეს მოხდა არის შეუქცევადი პროცესი. მიხეილ სააკაშვილს დიდი ალბათობით ვერ დააპატიმრებენ“ , – განაცხადა გრიგოლ ვაშაძემ.
მანანა ღოღობერიძე
