„ეს გამოიწვევს იმას, რომ აშშ და იერუსალიმი ტერორისტული ორგანიზაციების მიერ სამიზნეშია ამოღებული. შესაძლოა ეს პროცესი გამწვავდეს და იყოს თავდასხმები ამ ქვეყნებზე, დიპლომატიურ წარმომადგენლობებზე და რიგით მოქალაქეებზე“ , – აშშ-ის 45-ე პრეზიდენტის რადიკალურ გადაწყვეტილებაზე, ისრაელის დედაქალაქად იერუსალიმის აღიარების მნიშვნელობაზე, როგორც საერთაშორისო სკანდალზე, აღმოსავლეთმცოდნე ზურაბ ბატიაშვილმა „იმედის“ ეთერში, გადაცემა „ქრონიკასთან“ ისაუბრა.
„ტრამპის გადაწყვეტილებისთვის უნდა გავითვალისწინოთ აშშ-ის შიდა პოლიტიკური ვითარება, მას უნდა ყურადღების გადატანა საგარეო პოლიტიკური გადაწყვეტილებით. დღეს ეს საკითხი არის ნომერ პირველი საერთაშორისო ურთიერთობებისთვის. ამ გადაწყვეტილების განხილვა იყო გაეროს უშიშროების საბჭოს სხდომაზე და ყველა ქვეყანამ დაგმო თავის გამოსვლებში ეს ნაბიჯი. ტრამპმა ამით მოკავშირეები დაკარგა ახლო აღმოსავლეთის რეგიონში. თუმცა, ტრამპის პრესტიჟის საქმეა,რომ უკან აღარ წაიღოს ეს გადაწყვეტილება.
ეს ტრამპის ერთ-ერთი წინასაარჩევნო დაპირება იყო,თუმცა 1995 წლიდან აშშ იერუსალიმს აღიარებს დედაქალაქად. ყოველ 6 თვეში ერთხელ ყველა პრეზიდენტის მიერ ხდებოდა ამ სტატუსის იმპლემენტაციის გადადება, არც ერთი არ რისკავდა. ახლო აღმოსავლეთის ქვეყნებში ძალიან ძნელია სტატუს-კვოს შეცვლა და ნებისმიერი მცდელობა მტკივნეულად აღიქმება ყველა მოქმედი საერთაშორისო აქტორის მიერ.
იერუსალიმი არის სიმბოლო, ხოლო სიმბოლოებს დაპირისპირებებსა და ომში დიდი დატვირთვა აქვს, ეს ადგილი სამი დიდი რელიგიისთვის არის წმინდა ქალაქი. დაპირისპირება იუდეველებსა და მუსლიმებს შორის არის იმიტომ, რომ ერთი და იგივე ადგილები აქვთ წმინდა“ , – განაცხადა ზურაბ ბატიაშვილმა.
მანანა ღოღობერიძე
