ვატიკანში, კონსტანტინეს დარბაზში მიმდინარე სარესტავრაციო სამუშაოების დროს აღმოჩენილი ორი ფრესკა რენესანსის ეპოქის იტალიელ მხატვარს, რაფაელს ეკუთვნის. ამის შესახებ CNN თავის ვებგვერდზე წერს.
ექსპერტები მიიჩნევენ, რომ ეს რაფაელის ბოლო ნამუშევრებია და მხატვარმა ისინი 1519 წელს დახატა.
ფრესკებზე ქალის ორი ალეგორიული ფიგურაა გამოსახული: ერთი თავისუფლების სიმბოლოა, ხოლო მეორე- სამართლიანობის. რაფაელმა ნამუშევრების დასრულება ვერ მოასწრო, რადგან მუშაობის დაწყებიდან ერთ წელში, 37 წლის ასაკში გარდაიცვალა. მისი სიკვდილის შემდეგ კი კედელზე მუშაობა სხვა მხატვრებმა დაასრულეს, ამიტომ, რაფაელის ორი ფრესკა დავიწყებას მიეცა.
საიდან დაადგინეს, რომ ავტორი რაფაელია?
1508 წელს რომის პაპის, იულიუს II-ის დაკვეთით რენესანსის ეპოქის ოსტატმა, რაფაელმა, პაპის სასახლის ოთახების მოხატვა დაიწყო და ფრესკების მთელი ციკლი შექმნა, რომელთაგან ერთ-ერთი ყველაზე ცნობილი “ათენის სკოლაა”.
შემდეგ რაფაელმა მეოთხე ( და ერთ-ერთი ყველაზე დიდი ოთახის) მოხატვაზე დაიწყო ფიქრი : ეს იყო „კონსტანტინეს დარბაზი“. მისი გეგმა იყო, რომ ოთახი ზეთის საღებავით მოეხატა და არა ტრადიციული ფრესკის ტექნიკით.
ჯორჯო ვასარი 1550 წელს თავის წიგნში წერდა, რომ რაფაელმა მუშაობა ორ გამოსახულებაზე ახალი ექსპერიმენტით, ზეთის საღებავებით დაიწყო. სწორედ ეს ჩანაწერი გახდა ამ აღმოჩენის გასაღები. როდესაც რესტავრატორებმა 2017 წელს კონსტანტინეს დარბაზის კედლების გასუფთავება დაიწყეს, მათ გააანალიზეს, რომ ქალის ორივე გამოსახულება შესრულებული იყო ზეთის საღებავებით, მაშინ, როცა ოთახის დანარჩენი ნაწილი მოხატული იყო ტრადიციული ფრესკის ტექნიკით. ულტრაიისფერმა და ინფრაწითელმა ფოტოებმა მეცნიერების ეჭვი დაადასტურეს.
ვატიკანის მთავარმა რესტავრატორმა CNN -ს განუცხადა, რომ ნამუშევრები რაფაელის შესრულებულია კიდევ ერთი მიზეზის, „ ფუნჯის მონასმის მანერის“, ანუ, შესრულების ტექნიკის გამო. მისი თქმით, რაფაელი ქმნიდა ჩრდილების უჩვეულო ტონს. ასევე: „ფრესკების ქვეშ არ არის მოსამზადებელი ჩანახატები, ესკიზები, რომელსაც, როგორც წესი, უფრო ნაკლები დონის მხატვრები იყენებენ, ეს კი კიდევ ერთი ნიშანია იმისა, რომ ეს ნამუშევრები რაფაელისაა.“
ვატიკანის მუზეუმის ხელმძღვანელი, ბარბარა ჯატტა, ამბობს, რომ რაფაელის ფრესკებისა და დანარჩენი ოთახის აღდგენა 2022 წლამდე გაგრძელდება.
ნინი მაზიაშვილი
