ლარის კურსის გაუფასურებამ დოლართან მიმართებაში მტკივნეულად აისახა სამომხმარებლო ბაზარზე. ფასების მატება შეინიშნება როგორც საკვებ პროდუქტებზე, ასევე პირველადი მოხმარების საგნებზე. ლარის დასტაბილურებას ელოდებიან იმპორტიორებიც, რომლებიც ამ ეტაპზე იმპორტირებულ პროდუქციაზე ფასების ზრდას ამ დროისთვის არ აპირებენ.
ამის შესახებ „თბილისი თაიმსთან“ „საქართველოს დისტრიბუტორთა ბიზნეს ასოციაციის“ ხელმძღვანელი ივა ჭყონია საუბრობს. მისი განცხადებით, ბოლო პერიოდში ლარის მკვეთრმა გაუფასურებამ გაართულა მდგომარეობა ბაზარზე. თუმცა, ჭყონიას თქმით, ამ დროისთვის იმპორტიორები ფასების შენარჩუნებას ახერხებენ.
„ამ ეტაპისთვის ფასები არ მოიმატებს. პროცესი რომელიც უნდა დაწყებულიყო, სწრაფად ლიკვიდურ პროდუქციაზე, ფასებმა ოდნავ მოიმატა. თუმცა, ამ ეტაპზე იმპორტიორები ახერხებენ ღირებულების დასტაბილურებას და ფასები ძველ ნიშნულს უბრუნდება.“
ივა ჭყონიას თქმით, თუ ლარის კურსი დღევანდელ ნიშნულს შეინარჩუნებს, ფასების მატება იანვრის შემდეგაც არ მოხდება.
„ის კურსი, რაც დღეს არის დაფიქსირებული, ანალოგიური თუ დარჩება, იმპორტიორები მეორეული მოთხოვნის პროდუქტზე ფასებს არ გაზრდიან. აღსანიშნავია ისიც, რომ იმ გრძელვადიან პროდუქტზე, რომელზეც იანვრის თვეში იგეგმებოდა ფასების მატება, აღარ მოიმატებს.“
ჭყონიას განცხადებით, იმპორტიორებს საკმაოდ რთულ მდგომარეობაში უწევთ ყოფნა. ამ ეტაპისთვის კომპანიების მთავრი საზრუნავი ბაზარზე დარჩენა და პროდუქციის ფასების დასტაბილურებაა.
„მაქსიმალურად ვცდილობთ, ფასების მატებისგან თავი შევიკავოთ იმიტომ, რომ კომპანიებს თავი გავატანინოთ. დამერწმუნეთ, სადისტრიბუციო კომპანიებს საკმაოდ რთულ მდგომარეობაში გვიწევს ყოფნა. ჩათვალეთ, მოგებაზე არ ვფიქრობთ, გვინდა თავი გავიტანოთ, კომპანიები გადავარჩინოთ.“
მარიამ ლეკიაშვილი
