„აქ არის რელიგიური დემოკრატია და ირანის განვითარების გზა არის რელიგიური კომპონენტის მოშორება. დღეს და ხვალ ამის იმედი არავის აქვს, მაგრამ ეს პროტესტი პირველი ნაბიჯი იყო, ხალხმა გადალახა შიშის ბარიერი“ , – ირანში ამბოხების ჩახშობის შესახებ საერთაშორისო მიმომხილველმა კახა დგებუაძემ „იბერიაზე“, გადაცემაში „პანორამა“ ისაუბრა.
„ეს აქციები შეიძლება დავუკავშიროთ 2009 წელს, მაგრამ მაშინ აქციები იყო თეირანში და მასში მონაწილეობდა საშუალო კლასი, სტუდენტები. ახლა პროტესტი დაიწყო პროვინციებიდან, ჯერ მხოლოდ ეკონომიკური და სოციალური მოთხოვნებით. ლოზუნგები „სიკვდილი დიქტატორს“ „ჩემი ცხოვრება ირანისთვის“ უჩვენებს, რომ ირანის რეჟიმის საგარეო პოლიტიკა ჰგავს საბჭოთა კავშირს, ისლამური რევოლუციის იმპორტი ხდება. მილიარდები იხარჯება დესტრუქციულ ომებზე ახლო აღმოსავლეთის რეგიონში. არ გვაქვს ზუსტი ინფორმაცია არის თუ არა ეს ხალხის მცდელობა, მოშალონ თეოკრატიული რეჟიმი, არავინ იცის რეალურად რა პროცესები მიმდინარეობს.
2017 წელს ტრამპმა სიტყვით გამოსვლისას განაცხადა,რომ ადრე თუ გვიან ირანელი ხალხი დაუპირისპირდება თეოკრატიულ რეჟიმს, ამის შემდეგ შეთქმულების თეორიის მოყვარულებს მიეცათ საფუძველი,რომ საუდის არაბეთი, აშშ დაადანაშაულონ გარედან ჩარევებში. აშშ-ის დაზვერვის დირექტორი ამბობს,რომ შესაძლოა პროტესტი გაგრძელდეს, ალბათ უნდა ველოდოთ გარე ძალების დახმარებას.
2018 წელი ამერიკის საგარეო პოლიტიკის მიმართულებაში ალბათ დიდწილად დაეთმობა ირანს. ირანს რეგიონში აქვს ყველაზე კარგი საშუალება,რომ იყოს წარმატებული, აყვავებული სახელმწიფო. თუმცა, გამოვრიცხავ,რომ რეჟიმი ჩამოიშლება ან თეოკრატიული სისტემა მოიშლება“ , – განაცხადა კახა დგებუაძემ.
მანანა ღოღობერიძე
