„სასამართლოში არის ბევრი სისტემური პრობლემა და იქ მივდივარ საქმის გასაკეთებლად. მოსახლეობამ კარგად იცის მთელი „კრიტიკის თაიგული“ იუსტიციის საბჭოს მიმართ, მთავარი პრობლემაა კარჩაკეტილობა, თვითნებობა“ , – პრეზიდენტის ყოფილმა საპარლამენტო მდივანმა მომავალ გეგმებზე და იუსტიციის საბჭოს მუშაობის ხარვეზებზე „იმედზე“, გადაცემა „ქრონიკის“ ეთერში ისაუბრა. საქართველოს პრეზიდენტმა ანა დოლიძე იუსტიციის უმაღლესი საბჭოს ახალ წევრად ოფიციალურად წარადგინა.
„როდესაც პრეზიდენტის საპარლამენტო მდივნად ვმუშაობდი, ჩემი მთავარი ფუნქცია იყო პარლამენტთან, პოლიტიკის შემმუშავებელ ორგანოსთან ურთიერთობა. რა თქმა უნდა ჩემი საქმე იყო საკანონმდებლო პოლიტიკის შემუშავება, ასევე ვიყავი თავდაცვის მინისტრის მოადგილე და ვმუშაობდი თავდაცვისა და უსაფრთხოების პოლიტიკაზე. მთელი ეს პაკეტი ახლა მიმაქვს ჩემთვის ახალ ორგანოში,იუსტიციის საბჭოში,რომელსაც სჭირდება ქმედება და შედეგები.
სასამართლო გადაწყვეტილებები ხშირად მიიღება დაუსაბუთებლად, არგუმენტების გარეშე. სასამართლო უნდა იყოს ადგილი, სადაც მოქალაქე შეიტანს სარჩელს მარტივად, რიგში არ უნდა იდგეს და სწრაფად იღებდეს პასუხს. სასამართლო უნდა იყოს ხალხის სამსახურში და იუსტიციის საბჭო არსებობს იმისთვის,რომ სასამართლო მოიყვანოს ხალხის სამსახურში. საბჭო უნდა გახდეს ბევრად უფრო ღია, მოქალაქეებს და მედიას უნდა ჰქონდეთ საშუალება გაიგონ რა ხდება. გადაწყვეტილებები უნდა იყოს ღია და დასაბუთებული“ , – განაცხადა ანა დოლიძემ.
მანანა ღოღობერიძე
