„ეს წელი არაფრით გამორჩეული არ იქნება, უფრო მეტად მშვიდია ეს სეზონი შარშანდელთან შედარებით. ჯერჯერობით ლაბორატორიულად გრიპის ვირუსის ცირკულაცია არ შეინიშნება“ , – სეზონზე მოსალოდნელი ვირუსების შესახებ დაავადებათა კონტროლის ცენტრის ხელმძღვანელმა ამირან გამყრელიძემ „ტვ პალიტრას“ ეთერში, გადაცემაში „360 გრადუსი ცელსიუსით“ ისაუბრა.
„ვირუსები დაახლოებით ოქტომბრის დასაწყისიდან გაზაფხულამდე ცირკულირებენ, მაგრამ ჯერჯერობით გრიპი არ შეინიშნება. ის ევროპის რამდენიმე ქვეყანაში გამოჩნდა დეკემბერში. ჩვენთან გავრცელებულია რამდენიმე ვირუსი, რომელიც იწვევს მხოლოდ გრიპის მსგავს დაავადებებს. წლევანდელი სეზონი შედარებით მშვიდია, თუმცა იანვარი -თებერვალი საქართველოში პიკია და ალბათ მოსალოდნელია რესპირატორული ინფექციიების რიცხვის მომატება გრიპის ვირუსის გამო.
რთულია პროგნოზირება რა მასშტაბის იქნება დაავადებები. გრიპის საწინააღმდეგო აცრა არ არის სავალდებულო არც ერთ ქვეყანაში, ეს ნებაყოფლობითია, მაგრამ თანდათან ფართოვდება ადამიანების წრე, რომლებიც სახელმწიფოს დახმარებთ იცრებიან. მოთხოვნილება იზრდება , ახალ ბიუჯეტში დაახლოებით 40 ათასი ვაქცინა დევს ბიუჯეტში“ , – განაცხადა ამირან გამყრელიძემ.
მანანა ღოღობერიძე
