ქართულ ბაზარზე ქართული ხელნაკეთი ჩანთები გამოჩნდა, რომელმაც სრულიად ახლებური, განსხვავებული ხედვა და სტილი შემოიტანა სივრცეში. „ჰეფესტო“ 26 წლის არქიტექტორ დავით ხულორდავას შემოქმედებითი ბიზნესია, რომელიც შესაბამისი დანადგარით, ტყავისა და ხის გამოყენებით, სხვადასხვა სახის ნამუშევარს ქმნის. „თბილისი თაიმსს“ ბრენდის დამფუძნებელი ჩანთების შექმნის და მისი განვითარების შესახებ ესაუბრა.
თავდაპირველად, თქვენს შესახებ რომ მომიყვეთ, რას საქმიანობთ და საიდან გაგიჩნდათ იდეა შეგექმნათ ჩანთები?
– პროფესიით არქიტექტორი ვარ.ბავშვობიდან მიტაცებდა ხელნაკეთი ნივთების დამზადება. მომწონდა ნივთების შექმნისა და კეთების პროცესი. ჩემთვის და ახლობლებისათვის ხშირად ვაკეთებდი სხვადასხვა სახის ნივთს. მიუხედავად იმისა, რომ ყველას ძალიან მოსწონდა ჩემი ნამუშევრები, საკმაოდ დიდი ფიქრის შემდეგ გადავწყვიტე ჩემი ჰობი ძირითად საქმიანობად და შემოსავლის წყაროდ მექცია. საკუთარი სახსრებით შევიძინე ლაზერული გრავირების მანქანა, რომელიც მთავარი, ფუნქციური იარაღია ჩემს საქმიანობაში და მოვაწყე სახელოსნო. ჯერჯერობით, ძირითადად ვამზადებთ ტყავის ნაკეთობებს (ჩანთებს საფულეებს და ა.შ)
რატომ სახელი -„ჰეფესტო“?
– სახელი ჰეფესტო მოდის ძველი ბერძნული მითოლოგიიდან, რომელიც არის ცეცხლისა და მჭედლობის მფარველი ღმერთი. სწორედ ამიტომ, გადავწყვიტე, რომ ჩემი ნამუშევრები ამ სახელის ქვეშ გამეერთიანებინა.
ძირითადად რა მასალას იყენებთ და როგორია შექმნის პროცესი?
– უპირატესობას ბუნებრივ მასალებს ვანიჭებთ-ხეს, ტყავს, ქვას, მეტალს და ა.შ .მინდა, შევქმნა იშვიათი და განსხვავებული, გამორჩეული ნივთები, რაც მთავარია ხარისხიანი. თავდაპირველად ვქმნი ესკიზს, პროგრამულად ვამუშავებ და შემდეგ უკვე ვქმნი ნამუშევარს.ტყავის ნივთებზე ყველა ნაკერი და დეტალი ხელით იქმნება და მუშავდება. თავად შექმნის პროცესია, სასიამოვნო, განსაკუთრებით მაშინ, როდესაც ზუსტად ისეთი გამომდის, როგორიც ჩაფიქრებული მქონდა.
ჩანთების გარდა, კიდევ რა სახის ნივთებს ამზადებთ?
– გარდა ჩანთებისა ვამზადებთ ავეჯს, სანათებს, ინტერიერის გასაფორმებელ სხვადასხვა დეტალს.ჩვენი მთავარი მიზანია, მომხმარებლის სურვილები და იდეები რეალობაში განხორციელდეს, შევუქმნათ ისეთივე ნივთი, როგორიც მას წარმოსახვაში ჰქონდა. მთავარია ნივთის დამზადება იყოს შემოქმედებითი და საინტერესო.
სად შეიძლება მათი შეძენა და როგორია ფასები?
– ამ ეტაპზე, მომხმარებლები ფეისბუკის გვერდის საშუალებით გვიკავშირდებიან. თუმცა, ძალიან დიდი სურვილი მაქვს ახლო მომავალში გავხსნა საკუთარი სალონი, სადაც დაინტერესებულ პირებს ექნებათ შესაძლებლობა მოვიდნენ და ადგილზე დაათვალიერონ ნამუშევრები. რაც შეეხება ფასებს, ნივთების ღირებულება დამოკიდებულია, მასალაზე, ნივთის დამზადების შრომატებადობაზე, ნივთის დასამზადებლად საჭირო დროსა და სირთულეზე.
სამომავლო გეგმების შესახებ რომ მოგვიყვეთ, რა სიახლეებს გეგმავთ მომავალში?
– სამომავლოდ ვაპირებთ უფრო მრავალფეროვანი კოლექციის შექმნას, როგორც აქსესუარების ასევე ინტერიერის დიზაინის მიმართულებით. ვეცდებით მუდმივად განვვითარდეთ და სასიამოვნო და საინტერესო სიახლეები შევთავაზოთ ჩვენს ერთგულ მომხმარებლებს.
მარიამ ლეკიაშვილი
