ცოტა ხნის წინ ქართულ ბაზარზე კიდევ ერთი ახალი სტარტაპი გამოჩნდა. მუსიკალური წერო, რომელსაც ბავშვებისთვის საოცარი მელოდია მოაქვს საჩუქრად. “ჩიკატაი“ ბავშვის სათამაშოების ქართული ბრენდია, რომელის შექმნის იდეა თაკო ბუიღლიშვილს ეკუთვნის. „თბილისი თაიმსთან“ ბრენდის დამფუძნებელი სათამაშოების შექმნისა და სამომავლო გეგმების შესახებ საუბრობს.
თავდაპირველად თქვენს შესახებ რომ მომიყვეთ, საიდან გაგიჩნდათ იდეა წამოგეწყოთ ეს საქმიანობა?
– კონკრეტულად მიჭირს გახსენება რა იყო ინსპირაციის წყარო. მინდოდა, მქონოდა ჩემი საქმე და დიდი ხანი ვფიქრობდი, რა შეიძლებოდა ყოფილიყო ეს, ყველასგან განსხვავებული და ორიგინალური. „ჩიკატაის“ შექმნა დედასთან-თეა ჭანკოტაძესთან ერთად გადავწყვიტე. უფრო სწორად, რომ ვთქვა, მის გარეშე წარმოუდგენელი იქნებოდა ამის გაკეთება, რადგან სათამაშოები მისი შექმნილია. ბიზნესის კუთხით, არც ერთს გვქონია გამოცდილება.
რამდენი ხანია რაც ბაზარზე არსობობთ და როგორ შეხვდა მომხმარებელი თქვენს პროდუქციას?
– მიუხედავად იმისა, რომ ამ პროექტზე მუშაობა 1 წლის წინ დავიწყეთ, ბაზარზე გამოსვლა 2017 წლის 25 ოქტომბერს შევძელით. სულ 4 თვეა რაც ვარსებობთ, მაგრამ უკვე საკმაოდ ბევრი მეგობარი ჰყავს „ჩიკატაის“ და ერთგული მომხმარებებიც გავიჩინეთ. ჩვენი სათამაშოები უფრო მეტად სასაჩუქრე პროდუქციის ნიშას იკავებს. არაერთი სათამაშო გაიგზავნა საზღვარგარეთ მცხოვრებ პატარა ემიგრანტებთანაც, რაც ძალიან გვახარებს. ჩვენთვის ძალიან მნიშვნელოვანი და სასიხარულოა ის უკუკავშირი, რასაც ვიღებთ ჩვენი შემფასებლებისგან. ეს შეფასებები დიდ სტიმულს გვაძლევს, ზრდის პასუხისმგებლობის გრძნობასაც და გვიჩენს მოტივაციას, რომ ჩიკატაის სთამაშოები კიდევ უფრო მრავალფეროვანი გავხადოთ.
საიდან მოდის ბრენიდს სახელი და რასთანაა დაკავშირებული?
– „ჩიკატაის“ ვეძახდით ჩემ შვილს-ნიკალაის, როცა პატარა იყო. არ მახსოვს ვინ შეარქვა ეს მეტსახელი, მაგრამ თითონ ძალიან მოსწონდა და ყოველ ღამე გვთხოვდა მოგვეყოლა ზღაპრები „ჩიკატაიზე“. ასე გაჩნდა ეს პერსონაჟი ჩვენ ცხოვრებაში და ამიტომ ბევრი არც სახელის შერჩევაზე გვიფიქრია.
რა სახის ნივთებს ქმნით ძირითადად?
– ჩვენ ვქმნით მუსიკალურ სათამაშოებს, რომლებიც უკრავს ქართულ მელოდიას – გია ყანჩელის „ვალსი მიმინოდან“, ცნობილი როგორც „ყვითელი ფოთლები“. საცდელი ვერსია როგორც კი მივიღეთ, გავაკეთეთ პირველი სათამაშო და გავაცანით ბატონ გია ყანჩელს, რომელმაც ყოველგვარი პირობის გარეშე მოგვცა უფლება გამოგვეყენებინა ეს არაჩვეულებრივი მელოდია. ბატონი გია და სანდრო ყანჩელის დამსახურებით შედგა ჩვენი პროექტი, რისთვისაც ძალიან მადლიერები ვართ.
როგორია შექმნის პროცესი?
– ჩვენი სათამაშოები ხელნაკეთია და იქმნება საქართველოში. ვიყენებთ მხოლოდ ბუნებრივ და ანტიალერგიულ მასალებს. სამუშაოს გარკვეულ ნაწილს კერძო შეკვეთებით ვამზადებთ. ამ ეტაპზე ჩვენთან ერთად კიდევ 2 ადამიანი მუშაობს და იმედი გვაქვს ეს რიცხვი მალე გაიზრდება.
რა სირთულეები შეგხვდათ ბიზნესის დაწყებიდან დღემდე და როგორ შეძელით თავის დამკვიდრება?
– დაბრკოლებზე ბევრს არ ვისაუბრებ. მართლაც ძალიან ბევრი იყო, ყოველ ფეხის ნაბიჯზე. საქმეს კიდევ უფრო ართულებდა ის, რომ ჩვენ არ გვქონდა არანაირი გამოცდილება. ისიც არ ვიცოდით საიდან უნდა დაგვეწყო. მალევე მივხვდი, რომ ეს მარტივი სულაც არ იყო. ნელ-ნელა იმდენად რთულდებოდა ყველაფერი, ძალიან მეშინოდა იმისი, რომ ეს მშვენიერი იდეა არ გაგვეფუჭებინა ჩვენი გამოუცდელობით. შეიძლება ითქვას, „ჩიკატაი“ არის მთლიანად ინტუიციით შექმნილი ბრენდი. არ ვიცი როგორ მოვახერხეთ, რომ ეს პროექტი შედგა.
რითი ხართ გამორჩეული სხვებისგან? მთავარი განმასხვავებელი ნიშა
– გარდა იმისა, რომ ეს არის საქართველოში შექმნილი პირველი სათამაშო, რომელიც უკრავს ქართულ მელოდიას, ვფიქრობ, გამოვირჩევით ასევე ხარისხით. ამაზე მეტყველებს ისიც, რომ საკმაოდ ხშირად იგივე მომხმარებლები გვიბრუნდებიან და გვიკვეთავენ ახალ სათამაშოს განმეორებით.
როგორია ფასები და როგორ ხდება შეძენა?
– ჩვენი პროდუქციის შეძენა შესაძლებელია ფეისბუკისა და ინსტაგრამის საშუალებით. შეკვეთიდან არაუგვიანეს 5 დღეში მიგვაქვს მისამართზე ლამაზი შეფუთვით. რაც შეეხება ფასებს – ამ ეტაპზე ჩვენ გვაქვს 3 ტიპის მუსიკალური სათამაშო – ბეკეკა (60 ლარი), პინგვინი (70 ლარი) და ლოგინზე დასამაგრებელი სათამაშო (160 ლარი). მუსიკალურ მექანიზმს ადგილობრივად ვერ ვამზადებთ და ამიტომ გვიწევს იმპორტი. ასევე, ყველა სათამაშო ხელნაკეთია და იქმნება ბუნებრივი მასალებისგან. ამ ყველაფრის გათვალისწინებით, თითოეული სათამაშოს თვითღირებულება, თავისი შეფუთვით საკმაოდ მაღალია. იმედი გვაქვს ახლო მომავალში მოვახერხებთ ისე ავაწყოთ წარმოება, რომ შევძლოთ სათამაშოების თვითღირებულების დაწევა, მაგრამ, რა თქმა უნდა, ეს არ მოხდება ხარისხის ხარჯზე. ახლო მომავალში ვგეგმავთ ახალი ტიპის სათამაშოების დამატებასაც – არამუსიკალურის, რომელიც უფრო ხელმისაწვდომიც იქნება. ჩვენი მიზანია, რომ „ჩიკატაის“ სათამაშოები იყოს ყველასთვის ხელმისაწვდომი, ამავდროულად საყვარელიც და რაც მთავარია, ხარისხიანი.
სამომავლო გეგმების შესახებ რომ მომიყვეთ, რას გეგმავთ მომავალში?
– ალბათ, ისევე როგორც ყველა სტარტაპს, ჩვენც ძალიან დიდი გეგმები გვაქვს. ჩვენი მიზანია, რომ „ჩიკატაი“ რაც შეიძლება ბევრი ბავშვის საუკეთესო მეგობარი გახდეს, პროდუქცია გავხადოთ მაქსიმალურად მრავალფეროვანი და ახლო მომავალში გავაკეთოთ დიდი ქართული სათამაშოების მაღაზია. ვფიქრობთ, ექსპორტზე გასვლასაც, თუმცა ჯერ ცოტა ადრეა ამაზე საუბარი, რადგან ეს გარკვეულ პროცედურებს და რესურსს მოითხოვს რისთვისაც ჯერ მზად არ ვართ.
მარიამ ლეკაშვილი