“თბილისი თაიმსი“ წლის ერთ-ერთი მნიშვნელოვანი ტურისტული მოვლენის შესახებ მოგიყვებათ.
გაზაფხულის სეზონი მსოფლიოს ნებისმიერ კუთხეში ლამაზი და თვალწარმტაცია, მაგრამ მრავალი ტურისტისა და განსაკუთრებით, იაპონიის მოყვარულთა აზრით, გაზაფხული ყველაზე ლამაზად,სწორედ, იაპონიაში მოდის.
იაპონელებმა 2018 წლის საკურას ყვავილობის სეზონის პროგნოზი უკვე გამოაქვეყნეს. ყვავილობა სამხრეთ რეგიონებში უკვე დაწყებულია, იგი პიკს აპრილის დასაწყისში მიაღწევს და ყველაზე ბოლოს მაისის დასაწყისში, ჩრდილოეთ რეგიონებში დაასრულებს. ტურისტები მთელი წლის განმავლობაში ელოდებიან საკურას აყვავებას, თუმცა იაპონელებისთვის ეს მოვლენა უფრო მეტად დღესასწაულია, ვიდრე ლამაზი სანახაობა.
საკურას ყვავილობა ერთ ლოკაციაზე, დაახლოებით, 7 დღემდე გრძელდება, ამ დროის განმავლობაში იაპონელები ოჯახებთან ერთად მის ძირში ატარებენ მთელ დღეს და ტკბებიან ულამაზესი და სურნელოვანი ალუბლის ყვავილობით. ამ პერიოდში განსაკუთრებით გამორჩეულია „საკურას აყვავებული მთები“, რომელიც იაპონიის პატარა ქალაქ ტიკანოუეში (takinoue park) მდებარეობს, მთის ფერდობზე გაშენებულია 100 000 კვ.მ ყვავილების პარკი, სადაც საკურა ხარობს.
საკურას ყვავილობის დღესასწაული იაპონელებისთვის ახალი ცხოვრების დაწყების, ახალი ენერგიის, უარყოფითი მუხტისგან გაცლის და რაც მთავარია გაზაფხულის შემოსვლასთან ასოცირდება.
საკურა ერთ-ერთი უძველესი და მნიშვნელოვანი სიმბოლოა იაპონურ კულტურაში. იაპონური კულტურის მიხედვით, ალუბალი სამყაროს განასახიერებდა,ხოლო ალუბლის აყვავებული ხე კი გაზაფხულის, სიკეთისა და სიყვარულის სიმბოლო გახლდათ. ამ მოვლენის აღნიშვნა იაპონიაში, ჯერ კიდევ, ნარას ექოპიდან იღებს სათავეს (710-784 წ.)
გაზაფხულის მოახლოებისას იაპონური მედია აქტიურად აქვეყნებს საკურას ყვავილობის პროგნოზებს. ყვავილობის ტალღა გადაივლის მთელი ქვეყნის ტერიტორიაზე, სამხრეთიდან ჩრდილოეთისკენ და მას კვალდაკვალ მიჯყვებიან იაპონელებიც ტურისტებთან ერთად.
ნათია კეკენაძე