NASA -ს ყველაზე ძვირადღირებული ტელესკოპი კოსმოსში 2020 წლის მაისში გაეშვება. ჯეიმს ვები NASA -ს საერთაშორისო პროექტია, რომელსაც ის ევროპისა და კანადის კოსმოსურ სააგენტოებთან ერთად ახორციელებს. ტელესკოპი NASA -ს 8,8 მილიარდი აშშ დოლარიანი პროექტია, რომლის დიზაინიც ჰაბლის 1990 წლის ტელესკოპის მიხედვითაა შექმნილი. ჯეიმს ვების სახელობის პროექტის მიზანი ვარსკვლავთშორისი წყლის მოძებნაა.
მისი სარკის თვრამეტივე სეგმენტი დაახლოებით, 20 კილოს იწონის. NASA-ს ინჟინერის თქმით, ტელესკოპი მნიშვნელოვან აღმოჩენებს დაუდებს საფუძველს.
„ჯეიმს ვების კოსმოსური ტელესკოპი შეძლებს მზის სისტემის საიდუმლოებების ამოხსნას, ის გაიხედავს ძალიან შორს და გვეტყვის იმას, თუ როგორ წარმოიშვა ჩვენი სამყარო ,“– ამბობს ლი ფინბერგი.
ინფრაწითელ ინსტრუმენტთა გამოყენებით ტელესკოპი სამყაროს ადრეულ ვარსკვლავებსა და გალაქტიკებს, ახლომდებარე ვარსკვლავებთან არსებულ ეგზოპლანეტებს, ისევე როგორც მზის სისტემის მთვარეებსა და ასტეროიდებს შეისწავლის. მისიის ხანგრძლივობა 3 წელი და 11 დღე იქნება, ინჟინრების თქმით, ისინი მაქსიმალურად შეეცდებიან არ გაიმეორონ წარსულში დაშვებული შეცდომები.
NASA -ში ამბობენ, რომ ტელესკოპი ხშირ ტესტირებას გადის, ბოლო ტესტირებების შედეგად რამდენიმე მნიშვნელოვანი ხარვეზი გამოიკვეთა, რამაც განაპირობა მისიის 2 წლით გადადება. გადაწყვეტილება პროექტის მუდმივმოქმედმა საბჭომ მიიღო. მათი აზრით, გაშვებამდე რამდენიმე ფინალური ტესტია დარჩენილი, მიზეზი მიმდინარე ტესტირებისას გამოკვეთილი პრობლემებია.
ჯეიმს ვების სადგურის ორბიტაზე გასვლამდე NASA აპირებს,რომ კიდევ ერთი ახალი ტელესკოპი TESS-ი გაგზავნოს კოსმოსში. NASA მის გამოყენებას მზის სისტემის გარეთ პლანეტების აღმოსაჩენად გეგმავს. ტელესკოპი დააკვირდება ვარსკვლავებს, მათ ვარდნასა და სიკაშკაშეს. მეცნიერების თქმით, ეს მისია ჯეიმს ვების ობსერვატორიის წინამორბედი იქნება. მის მიერ მოპოვებულ ინფორმაციასა და ჯეიმს ვების ტელესკოპის მოწოდებულ მასალებს ერთობლივად დაამუშავებს 2020 წლისთვის ობსერვატორია.
წყარო : www.cnn.com
ნათია კეკენაძე
