ბაზარზე კიდევ ერთი ახალი ნატურალური საპნების მწარმოებელი კომპანია გამოჩნდა. „სოაპია“ ქართული კომპანიაა, რომელიც ორიენტირებულია ნატურალური და ბუნებრივი ინგრედიენტებისგან დამზადებული პროდუქციის წარმოებაზე. პროდუქცია ხელნაკეთია, მაქსიმალურად ჯანსაღია და არ მუშავდება ქიმიურად. როგორც „თბილისი თაიმსთან“ საუბრისას კომპანიის ბრენდის დამფუძნებელი მაია თედიაშვილი განმარტავს, წარმოების დროს დაცულია ყველა პირობა, რომ საბოლოო პროდუქტი იყოს სრულყოფილი და შენარჩუნებული ჰქონდეს სასარგებლო თვისებები.
ჩვენს მკითხველს რომ მოუყვეთ, საიდან გაჩნდა ხელნაკეთი ორგანული საპნების დამზადების იდეა?
– ზოგადად ვიცით როგორია ქართული ბაზრის რეალობა, როგორი პროდუქცია შემოდის იმპორტით. ჯანსაღი და ნატურალური პროდუქტის დიდი დეფიციტია. ამიტომ გადავწყვიტეთ გვეწარმოებინა ისეთი ჰიგიენური და კოსმეტიკური პროდუქცია, რომელიც იქნებოდა მაქსიმალურად ნატურალური პროდუქტი, შენარჩუნებული ექნებოდა სასარგებლო თვისებები და ამავდროულად იქნებოდა ხელმისაწვდომი ყველანაირი შემოსავლის მქონე ადამიანისთვის. მსგავსი ხელნაკეთი პროდუქცია იწარმოება სხვა ქვეყნებშიც და დიდი პოპულარობით სარგებლობს მომხმარებელში.
საპნების გარდა, კიდევ რა სახის პროდუქციას აწარმოებთ ?
– ჩვენი ძირითადი პროდუქტი საპონია. ვაწარმოებთ საპნის რამოდენიმე სახეობას, რომლის ასორტიმენტსაც აუცილებლად კიდევ გავზრდით. გვაქვს საპონი ცხიმიანი და კომბინირებული კანისთვის, ასევე მშრალი და მგრძნობიარე კანისთვის. საპონთან ერთად გვაქვს ტანის კარაქი, რომელიც 100% ნატურალური პროდუქტია და არ შეიცავს არანაირ ქიმიურ დანამატს. არომატიც კი ბუნებრივად აქვს, რაც კაკაოს კარაქის დამსახურებაა. კარაქი გამოიყენება როგორც სახეზე, ისე ტანითვის და არაჩვეულებრივი შედეგი აქვს თმის ნიღბად გამოყენების შემთხვევაშიც, რადგან დამზადებულია ქოქოსის, შიის, კაკაოს და ნუშის ზეთებისგან. ასევე ვაწარმოებთ ტუჩის ბალზამს, ჟოლოს და ფორთოხლის არომატით და აბაზანის ბომბების სხვადასხვა სახეობას.
რითია გამორჩეული თქვენი პროდუქცია?
– პირველ რიგში ჩვენი პროდუქცია გამორჩეულია ხარისხით, შემადგენლობით და იმ შედეგებით რაც პროდუქციის გამოყენებისას მიიღწევა. რეცეპტები უნიკალურია და შედგენილია ყველა წესის დაცვით, რომლის დამსახურებაცაა პროდუქტის გამოყენებისას მიღებული ეფექტი და დადებითი შედეგები. გამოირჩევა ვიზუალური ეფექტითაც. ხელნაკეთი პროდუქციის ერთ-ერთი გამორჩეული თვისება ისაა, რომ ყველა ქმნილება უნიკალურია და არ არსებობს ზუსტად იდენტური ვიზუალის მქონე პროდუქტი. ვერაფრით გააკეთებ 100%-ით იდენტურ პროდუქტს, იგივე მასალის ანდა რეცეპტის გამოყენების შემთხვევაშიც კი. ჩვენ საპნის წარმოების მეთოდიც ისეთი შევარჩიეთ, რომელიც მზა პროდუქტის მისაღებად ითხოვს მეტ დროს, თუმცა ვიზუალური მხარე ბევრად ეფექტური და დახვეწილი აქვს, ვიდრე სხვა მეთოდების გამოყენებისას მიიღწევა.
როგორია ფასები და სად შეიძლება შეძენა?
– ვფიქრობთ ფასები ყველასთვის ხელმისაწვდომია. ფასები მერყეობს 3 ლარიდან 10 ლარამდე, განსხვავდება პროდუქტის სახეობების მიხედვით. შეძენა შესაძლებელია ონლაინ მაღაზიის მეშვეობით, Facebook გვერდზე. შეუკვეთავთ სასურველ პროდუქტს და კურიერი მოგართმევთ სასურველ მისამართზე. რეგიონებში კი მიიღებთ საქართველოს ფოსტის მეშვეობით.
როგორია თქვენი სამომავლო გეგმები, ხომ არ აპირებთ პროდუქციის ექსპორტზე გატანას?
– სამომავლო გეგმებში ჯერჯერობით ქართული ბაზრის ათვისება შედის. იგეგმება პროდუქციის მაღაზიებში გატანა, როგორც თბილისში, ისე ქუთაისში, ბათუმსა და ბორჯომში. პარალელურად აუცილებლად გვექნება ონლაინ მაღაზიაც და საკურიერო მომსახურებაც.
მარიამ ლეკიაშვილი
