თბილისის ტრანსფერი მცირდება, მაგრამ თბილისის შემოსავლები იზრდება, – ამის შესახებ ფინანსთა მინისტრმა ნოდარ ხადურმა სასტუმრო “რედისონ ბლუ ივერიაში” ჟურნალისტებთან საუბრისას განაცხადა.
ნოდარ ხადურმა კომენტარი არ გააკეთა დედაქალაქის მერის, გიგი უგულავას მიერ თბილისის ბიუჯეტთან დაკავშირებით გუშინ გაკეთებულ განცხადებაზე.
ხადურის თქმით, საქართველოს ფინანსთა სამინისტრომ დღეს თბილისის მომავალი წლის ბიუჯეტთან დაკავშირებით ვრცელი განცხადება გაავრცელა.
“მომავალ წელლს, თბილისის ბიუჯეტს ექნება 200 მილიონი ლარით მეტი თანხა ვიდრე წელს”, – განაცხადა ნოდარ ხადურმა.
რაც შეეხება ოლიმპიური სოფლის მშენებლობის დაფინანსებას, ხადურის თქმით, სამინისტრო ამაზე მუშაობს. მისივე თქმით, ქალაქის მერიას აქვს თავისი ვალდებულები და ჯობია, მერიამ თავისი ვალდებულებები შეასრულოს.
რაც შეეხება 2014 წლის სახელმწიფო ბიუჯეტის პროექტს, სადაც შემოსავლები 2013 წლის გეგმასთან შედარებით 42 მილიონ 700 ათასი ლარით ნაკლებია, ხადურმა ეს ნაკისრი ვალდებულებებით ახსნა.
“200 მილიონი ლარი უნდა დავაბრუნოთ საშემოსავლო გადასახადიდან, ეს არის ის ვალდებულება, რომელიც ჩვენ ავიღეთ და ამას შევასრულებთ. შესაბამისად, რომ არ ყოფილიყო ეს თანხა, ბიუჯეტი 200 ლარით მეტი იქნებოდა, თბილისის ტრანსფერი მცირდება, მაგრამ თბილისის შემოსავლები იზრდება”, – განაცხადა ნოდარ ხადურმა.
მისივე ინფორმაციით, თბილისის ბიუჯეტი სახელმწიფო ბიუჯეტიდან მიღებულ ტრანსფერს არ ხარჯავს.
”დღესაც ანგარიშზე 195 მილიონი ლარი აქვს თბილისის ბიუჯეტს ცენტრალური ბიუჯეტიდან მიცემული ტრანსფერი. როგორც ჩანს, არ სჭირდება თბილისს ეს ფული. რომელ რაიონებსაც სჭირდება, განსაკუთრებით მაღალმთიან რაიონებს, ისინი მიიღებენ გაზრდილ ტრანსფერს”, – განაცხადა ნოდარ ხადურმა.
მისივე თქმით, მიმდინარე წლის ბოლოს და მომავალი წლის დასაწყისში სამინისტრო ინვესტიციების მოცულობის რადიკალურ ზრდას ელოდება, რაც მინისტრის შეფასებით, ეკონომიკას კიდევ უფრო მეტად გაზრდის.
ხადურის განცხადებით, ეკონომიკის ზრდის 5%-იანი პროგნოზი კონსერვატიულია.
03.10.13
