დღევანდელ დღეს, მარტივია, იყო საუკეთესო, ორიგინალური და ინოვაციური იდეების მატარებელი. თუმცა, არც ისე მარტივია, ეს იდეები გახდეს პრაქტიკული და ყველასთვის ხელმისაწვდომი. ასე თუ ისე, ყველა პროექტსა და იდეას სჭირდება ფინანსები. ფინანსების გარეშე, როგორი მრავალფეროვანიც უნდა იყოს იდეა, ის ვერ შედგება.
Charity City – არის პროექტი, რომელიც იძლევა თანხების მოზიდვის შესაძლებლობას სხვადასხვა სამიზნე ჯგუფისთვის. ის ორგანიზებას უწევს საქველმოქმედო აუქციონებს და უზრუნველყოფს, ასევე, სამოქალაქო ჩართულობის ახალ ინფრასტუქტურას. „თბილისი თაიმსის“ შეკითხვებს პასუხობს გიორგი არზიანი, Charity City-ის დამფუძნებელი:
რამდენი ხანია, რაც ეს პროექტი მიმდინარეობს?
სულ რაღაც, ხუთი თვეა, რაც ის მიმდინარეობს. თუმცა – დიდი პაუზებით. ეს იმიტომ, რომ ჩემს სხვა პარალელურ პროექტებს მიაქვს ბევრი დრო, მაგალითად – გამომცემლობა რემედასის განვითარებას და თბილისის სოციალური კვლევების სკოლის ჩამოყალიბებას.
რას უწევთ ორგანიზებას?
ჩვენ ვაორგანიზებთ აუქციონებს, რომლებიც შესაძლებლობას აძლევს საქველმოქმედო ორგანიზაციებს, მოიზიდოს თანხები სოციალური და საგანმანათლებლო/სამეცნიერო პროექტების გასახორციელებლად. აუქციონებზე ჩვენ ვათამაშებთ პირისპირ შეხვედრებსა და მასტერკლასებს გამორჩეულ და ცნობილ ადამიანებთან. გამარჯვებული არა მხოლოდ ეხმარება იმათ, ვისაც ეს სჭირდება, არამედ კიდევ იღებს საინტერესო და სასიამოვნო გამოცდილებას, იქნება ეს პირისპირ შეხვედრა ჩაიზე, ან – ყავაზე, თუ – მასტერკლასი.
რა ძირითად მიზნებზეა ის ორიენტირებული?
მეტი სახსრების კონცენტრირებაზე ქველმოქმედებაში, კულტურასა და, ამასთანავე, განათლებაში.
პირადად თქვენ როგორ ფინანსდებით?
ჩვენ ვიყავით ორი სტარტ-აპ კონკურსის ფინალისტები – საქართველოში Social Impact Award-ის და სომხეთში Sevan Start-Up Sammit-ის. მაგრამ, სამწუხაროდ, ვერ მივიღეთ დაფინანსება. ამის გამო, გვიწევს მუშაობა მხოლოდ ფეისბუქსა და გუგლ ფორმებში – ონლაინპლატფორმის შექმნა ცოტა გადაიდო. თუმცა, ამან არ შეგვიშალა ხელი 150 ლარის შეგროვებისთვის პირველივე აუქციონზე. თანხა მიემართა საბჭოთა წარსულის კვლევის ლაბორატორიას , ერთ-ერთ ყველაზე მნიშნელოვან ქართულ სამეცნიერო ინსტიტუციას.
თქვენი პროფილის პროექტი ბევრია ჩვენს ქვეყანაში?
საქართველოში ჩვენ პირველები ვართ, თუმცა თვითონ ეს მოდელი საკმაოდ გავრცელებულია გავითარებულ ქვეყნებში. და მე დარწმუნებული ვარ, რომ აქაც იმუშავებს.
ვისთვის არის ხელმისაწვდომი თქვენი პროექტით სარგებლობა?
ჩვენ ვაკავშირებთ საქველმოქმედო ფონდებსა და პოტენციურ დონორებს. აუქციონში მონაწილება ღიაა ნებისმიერი კეთილსინდისიერი ადამიანისთვის.
სამომავლოდ, რას გეგმავს Charity City?
ჩვენ, ასევე, დაინტერესებულები ვართ ენდაუმენტების მოდელების შემუშავებით, რომელთა გამოყენება შესაძლებელი იქნება საქართველოში, რაც ხარისხობრივად გაზრდის მესამე სექტორის დამოუკიდებულობასა და ეფექტურობას.
მარიამ ტიელიძე
