ამერიკული კვლევითი კომპანია “გრინბერგ, ქუინლან, როზნერ რისერჩის” კვლევის თანახმად, გამოკითხულთა უმეტესობა პრემიერ-მინისტრ ბიძინა ივანიშვილის მიერ განხორციელებულ საქმიანობას ეკონომიკის წინსვლასთან მიმართებაში არ ემხრობა.
კითხვაზე, ემხრობით თუ არ ემხრობით ბოლო კვირების და თვეების განმავლობაში პრემიერ-მინისტრ ივანიშვილის მიერ განხორციელებულ საქმიანობას ეკონომიკის წინსვლასთან მიმართებაში, გამოკითხულთა 66% აცხადებს, რომ არ ემხრობა, ხოლო 25% – ემხრობა.
კვლევის თანახმად, მაისიდან სექტემბრამდე 46-დან 66%-მდე გაიზარდა იმ ადამიანთა რიცხვი, ვინც პრემიერის საქმიანობას ეკონომიკის წინსვლასთან მიმართებაში არ ემხრობა, ხოლო 46-დან 25%-მდე შემცირდა მომხრეთა რიცხვი.
კითხვაზე, ემხრობით თუ არ ემხრობით ბოლო კვირების და თვეების განმავლობაში პრემიერ-მინისტრ ივანიშვილის მიერ განხორციელებულ საქმიანობას დანაპირებების შესრულებასთან მიმართებაში, ემხრობა – 33%, არ ემხრობა – 60%.
კვლევის თანახმად, მაისიდან სექტემბრამდე ამ მხრივ მომხრეთა რიცხვი 53-დან 33%-მდე შემცირდა, ხოლო მათი რიცხვი, ვინც არ ემხრობა, – 40-დან 60%-მდე გაიზარდა.
საზოგადოებრივი აზრის კვლევა ამერიკულმა კვლევითმა კომპანიამ “გრინბერგ, ქუინლან, როზნერ რისერჩმა” (Greenberg, Quinlan, Rosner Research) საქართველოს პრეზიდენტის ადმინისტრაციის დაკვეთით ჩაატარა. კვლევა ჩატარებულია მთელი ქვეყნის მასშტაბით 1,204 პირისპირი ინტერვიუს გზით; კვლევის ჩატარების თარიღია 2013 წლის 15-21 სექტემბერი;
ცდომილება +/- 2.8%-ია.
04.10.13
