ფანქრის სკულპტურები ქართულ ბაზარზე

ხელოვნება სწორედ იმიტომაა საოცარი, რომ ადამიანს შეუძლია  ჩართოს საკუთრი ფანტაზია და ბოლომდე თავისუფლად მიჰყვეს მას. ასე მოხდა  ალექსანდრე კობეშავიძის შემთხვევაშიც. ერთ სრულიად ჩვეულებრივ დღეს, ფანქრის გათლის დროს  მიხვდა, რომ გათლილი ფანქრის წვერს ლარნაკის ფორმა ჰქონდა. ასე შეიყოლა უცნაურმა ხელოვნებამ და უკვე სამი წელია  შემთხვევით აღმოჩენილი საყვარელი ჰობი, მცირე ბიზნესადაც აქცია. “თბილისი თიამსს” ალექსანდრე ბრენდის შექმნისა და სამომავლო გეგმების შესახებ უყვება.

საიდან გაგიჩნდათ იდეა შეგექმნათ ფანქრის სკულპტურები?

ბავშობიდან მიყვარდა ხატვა, რასაც ცხოვრების გარკვეულ ეტაპზე თავისუფალი დროის დიდ ნაწილს ვუთმობდი სანამ „ფანქart” გაჩნდებოდა.სწორედ ხატვის დროს, როდესაც ფანქარს წვერს ვუთლიდი, თვითონ გათლის პროცესს შევყევი და რამდენიმე წუთში ფანქარს რომ დავაკვირდი რაღაც ფიგურას, ლარნაკს, მივამსგავსე. ასე გამიჩნდა ფანქრის გულში ფიგურების გამოსახვის იდეა.

რამდენი ხანია რაც არსებობს ფანქart-ი და როგორ შეხვდა მომხმარებელი?

სამი წლის განმავლობაში ის იყო ჩემთვის საყვარელი ჰობი, რაც ძალიან დიდ სიამოვნებას მანიჭებდა. ამ ზაფხულს გადავწყვიტე მისთვის უფრო ოფიციალური სახე მიმეცა და ასე გაჩნდა „ფანქart”, მომხმარებელი მას ძირითადად ფეისბუქის საშუალებით ეცნობოდა, იყო შემთხვევები „Flea Market” და “Tbilisi street market”, როცა მომხმარებელმა საკუთარი თვალით ნახა ნამუშევრები, რომელთა რეაქციამაც ძალიან დიდი სტიმული მომცა გამეგრძელებინა არჩეული საქმე.

რა არის ნამუშევრების მთავარი თემატიკა?

მთავარი თემატიკა დამოკიდებულია ჩემ ხასიათზე და სურვილზე, მიყვარს სერიულად რაიმე სახის ფიგურების გაკეთება მაგ. მუსიკალური ნივთების, ღირსშესანიშნაობების და ა.შ. ასევე დიდი როლი უკავია მომხმარებელთა შეკვეთებს, რაზეც მუშაობა ძირითად შემთხვევაში ორმაგად საინტერესოა.

როგორია ნამუშევრების  შექმნის პროცესი?

შექმნის პროცესი იწყება ფანქრის გათლით, შემდეგ ვაკვირდები მას და ვცდილობ ფიგურის საბოლოო სახე წარმოვიდგინო, რის მერეც ვიწყებ უშუალოდ გრაფიტზე მუშაობს.

სად არის შესაძლებელი მათი შეძენა?

მათი შეძენა შესაძლებელია ფეისბუქის გვერდ „ფანქart-ის” საშუალებით, ასევე ხშირად გამაქვს ნამუშევრები ადგილობრივ ბაზრებზე.

როგორია თქვენი სამომავლო გეგმები?

ამ ეტაპზე მსურს საქართველოს მოსახლეობის რაც შეიძლება დიდმა ნაწილმა კარგად გაიცნოს „ფანქart”, ასევე პარალელურად ვმუშაობ უცხოეთის ბაზრების შესწავლაზე და  ვცდილობ დავაინტერესო ჩემი ნამუშევრებით.

მარიამ ლეკიაშვილი