ესტონეთში საქართველოს პირველი დემოკრატიული რესპუბლიკის 100 წლისთავისადმი მიძღვნილი ღონისძიება გაიმართა
საქართველოსა და ავსტრიის საელჩოების ორგანიზებით, ქ.ნარვაში, ტარტუს უნივერსიტეტის კოლეჯში, ფოტო-გამოფენები: „50 ქალი საქართველოდან“ და „კალიოპე ავსტრია – ქალები საზოგადოებაში, კულტურასა და მეცნიერებაში“ გაიხსნა. ღონისძიება, საქართველოს, ესტონეთისა და ავსტრიის საიუბილეო 100 წლისთავს მიეძღვნა.
საზეიმო ცერემონიაზე დამსწრე საზოგადოებას მისასალმებელი სიტყვით მიმართა ესტონეთის რესპუბლიკაში საქართველოს საგანგებო და სრულუფლებიანმა ელჩმა, თეა ახვლედიანმა. საქართველოს ელჩმა სიტყვით გამოსვლისას განსაკუთრებული ყურადღება გაამახვილა 2018 წლის ისტორიულ დატვირთვაზე, როგორც ესტონეთის რესპუბლიკისთვის, ასევე საქართველოსა და ავსტრიისთვის.
თეა ახვლედიანმა ყურადღება გაამახვილა გამოფენის მნიშვნელობაზე და ისაუბრა საქართველოდან წარმოდგენილი 50 გამოჩენილი ქალის, მათ შორის, მხატვრების, მწერლებისა და საზოგადო მოღვაწეების მნიშვნელოვან როლსა და გავლენაზე მე-19 და მე-20 საუკუნეების ქართული საზოგადოების პროგრესული განვითარების საკითხში. თეა ახვლედიანმა, ასევე ხაზი გაუსვა საქართველოში მე-19 საუკუნის ბოლოდან განვითარებულ ეროვნულ პროცესებს, რომლებიც მიმართული იყო დემოკრატიული ფასეულობებისადმი ერთგულების, ადამიანის უფლებათა დაცვის, ტოლერანტობისა და გენდერული თანასწორობისკენ. „ეს გამოფენა უკავშირდება იმ პერიოდსაც, როდესაც საქართველოს სახელმწიფო მტკიცე ნაბიჯებს დგამდა საერთო ევროპული ღირებულებების მიმართულებით, რაც განსაზღვრავს ჩვენი ქვეყნის ადგილს დასავლური ცივილიზაციის სხვა სახელმწიფოებს შორის” – აღნიშნა საქართველოს ელჩმა.
ღონისძიებას, რომელიც მიზნად ისახავდა მე-19 საუკუნეში, ქალთა მნიშვნელოვანი როლის ხაზგასმას ქართული და ავსტრიული საზოგადოებების ჩამოყალიბების პროცესში, ესწრებოდნენ ესტონეთის რესპუბლიკის პრეზიდენტი კერსტი კალიულაიდი, ესტონეთში აკრედიტებული ელჩები, ასევე ადგილობრივი ორგანიზაციების, კულტურისა და აკადემიური წრეების წარმომადგენლები.
ფოტო-გამოფენის დათვალიერება მსურველებს მიმდინარე წლის დეკემბრამდე შეეძლებათ.