21 დეკემბერს, 15:00 საათზე, თბილისის ზ. ფალიაშვილის სახელობის ოპერისა და ბალეტის პროფესიულ სახელმწიფო თეატრში ცნობილი მომღერლის (ლირიკული ტენორი), პედაგოგის, საქართველოს სახალხო არტისტის დავით ბადრიძის დაბადებიდან 120 წლისთვისადმი მიძღვნილი საიუბილეო გამოფენა გაიხსნება. ექსპოზიციაზე ოჯახის არქივიდან მომღერლის ცხოვრებისა და შემოქმედების ამსახველი კოლექცია იქნება წარმოდგენილი: ფოტოები, სხვადასხვა დოკუმენტები, ჯილდოები, აფიშები, პროგრამები, გრამფირფიტები, მემორიალური ნივთები, დადგმული სპექტაკლების დეკორაციისა და კოსტიუმის ესკიზები,
ოპერისა და ბალეტის თეატრის არქივის სასცენო კოსტიუმები, გაშვებული იქნება ნაწყვეტები კინოფილმიდან ,,ჯურღაის ფარი’’.
თბილისის ოპერისა და ბალეტის თეატრში (1926-1934) დავით ბადრიძის დებიუტი ჯუზეპე ვერდის ოპერით ,,რიგოლეტო“ შედგა, სადაც მან ჰერცოგის პარტია შეასრულა. 1940-იან წლებში მღეროდა მოსკოვის დიდი თეატრის საოპერო სცენაზე და ეწეოდა პედაგოგიურ მოღვაწეობას გნესინების სახელობის მუსიკალურ ინსტიტუტში. დავით ბადრიძე გამოირჩეოდა ლამაზი ტემბრის, სრული დიაპაზონის ხმით, მაღალი ვოკალურ-სცენური კულტურითა და არტისტიზმით.ასრულებდა ქართული და კლასიკური საოპერო რეპერტუარის წამყვან პარტიებს, ეწეოდა საკონცერტო და საოპერო მოღვაწეობას, საქართველოს გარდა ყოფილი სსრკ ქალაქებში და უცხოეთში. მომღერლის სამსახიობო სფერო კინემატოგრაფიაშიც აისახა. 1944 წელს გადაღებულია რეჟისორ სიკო დოლიძისა და დავით რონდელის ფილმში ,,ჯურღაის ფარი““, რომელმაც სახელმწიფო პრემია დაიმსახურა.
დავით ბადრიძესადმი მიძღვნილი გამოფენის გახსნას თბილისის ოპერის თეატრში მასნეს „ვერთერის“ საპრემიერო დღეებში სიმბოლური დატვირთვა აქვს. ბატონი დავითი თბილისის ოპერის თეატრის სცენაზე ბოლოს 1942 წელს სწორედ ამ ოპერაში წარსდგა საყვარელი მაყურებლის წინაშე. გამოფენა 21 დეკემბერს გაიხსნება და 30 დეკემბრამდე გაგრძელდება.
