საქართველოს პრემიერ-მინისტრი ბიძინა ივანიშვილი კონფლიქტოლოგ გოგი ხუციშვილის გარდაცვალების გამო მწუხარებას გამოთქვამს.
“დიდ მწუხარებას გამოვთქვამ გამორჩეული მოქალაქის, კონფლიქტოლოგისა და პოლიტოლოგის გიორგი (გოგი) ხუციშვილის გარდაცვალების გამო.
თავისი საქმიანობით, პროფესიონალიზმით, მოქალაქეობრივი პოზიციით, პრინციპულობით, კეთილშობილებით გიორგი ხუციშვილმა საზოგადოების პატივისცემა დაიმსახურა. მას მნიშვნელოვანი წვლილი შეჰქონდა სამოქალაქო საზოგადოების განვითარების საქმეში. კონფლიქტების მართვის ცოდნით მან ასევე მოიპოვა აფხაზური და ოსური საზოგადოებების დამსახურებული პატივისცემა. იგი ავტორიტეტით სარგებლობდა საერთაშორისო არასამთავრობო ორგანიზაციებსა და საექსპერტო წრეებში”, – ნათქვამია პრემიერის სამძიმრის წერილში.
ამასთან, ბიძინა ივანიშვილის შეფასებით, ყოველთვის გაწონასწორებული და კორექტული – ამ თვისებებით გამოირჩეოდა გიორგი ხუციშვილი.
“ეს თვისებები იშვიათია ჩვენს დაძაბულ ყოფაში. ამ ღირსებების გამო მას განსაკუთრებულ პატივს სცემდნენ. გიორგი ხუციშვილს პატივს სცემდნენ ოპონენტები, იმიტომ, რომ ის ყოველთვის მზად იყო, გაეთვალისწინებინა განსხვავებული აზრი, თუკი იგი იყო დასაბუთებული და პროგრესული. სამძიმარი მინდა ვუთხრა მის ოჯახს, მეგობრებსა და ახლობლებს, თანამოაზრეებს”, – აღნიშნულია ბიძინა ივანიშვილის განცხადებაში.
08.10.13
