გაერთიანებული ერების განათლების, მეცნიერებისა და კულტურის ორგანიზაცია იუნესკოს დადგენილებით 2013 წელი გამოცხადებულია, როგორც ექვთიმე თაყაიშვილის წელი. ადამიანის, რომელმაც პატივი დასდო მისი არსებობით არა მხოლოდ სამშობლოს, არამედ მსოფლიოს.
სწორედ ამ საკითხთან დაკავშირებით საქართველოს საპატრიარქოს, წმიდა ანდრია პირველწოდებულის სახელობის ქართულ უნივერსიტეტში გუშინ ექვთიმე თაყაიშვილის ცხოვრებისა და მოღვაწეობისადმი მიძღვნილი კონფერენცია გაიმართა, რომელსაც ესწრებოდნენ უნივერსიტეტის რექტორი, პროფესორი სერგო ვარდოსანიძე, გელათის აკადემიის პრეზიდენტი მეუფე იოანე, საჩხერისა და ჭიათურის მიტროპოლიტი დანიელი, „იაკობ გოგებაშვილის სახელობის ქართული სასწავლებლის“ დამაარსებელი ლევან ვასაძე, აკადემიოსი როინ მეტრეველი, აკადემიური პერსონალი და უნივერსიტეტის სტუდენტები.
კონფერენცია პროფესორმა სერგო ვარდოსანიძემ გახსნა, რომელმაც ამ დღის მნიშვნელობაზე და ექვთიმე თაყაიშვილის ღვაწლმოსილ საქმიანობაზე ისაუბრა.
როინ მეტრეველის განცხადებით, ექვთიმე თაყაიშვილი, არის საქართველოს ისტორიის მწვერვალი, ამომავალი ფიგურა. მან წმიდა ექვთიმე ღმრთისკაცის ბიოგრაფიული ცნობები გააცნო დამსწრე საზოგადოებას.
ლევან ვასაძემ მის მიერ წარმოთქმულ სიტყვაში განაცხადა, რომ პატრიარქი მოგვიწოდებს, ისტორიაზე არ ვიფიქროთ მხოლოდ, როგორც ფაქტოლოგიაზე, არამედ იმაზე თუ რატომ ხდება ისტორიაში ყოველივე და რას აკეთებენ პიროვნებები საქართველოს ისტორიაში.
მისი თქმით საჭიროა გავიაზროთ თუ რატომ ხდება თუნდაც ნებისმიერი ომი, რატომ მოხდა მაგალითად 2008 წლის აგვისტოს ომი. აგრეთვე მნიშვნელოვანია იმაზე ფიქრი თუ რატომ მოევლინა წმიდა ექვთვიმე ღვთისკაცი საქართველოს ძნელბედობის პერიოდში.
ლევან ვასაძემ უფრო ფილოსოფიური კუთხით მიმოიხილა ექვთიმე თაყაიშვილის მოღვაწეობა და მის სულიერ მდგომარეობასა და ბიბლიურ ალეგორიებზეც გაამახვილა ყურადღება. აღნიშნა იმ ეპოქის მდგომარეობა, რომელ ეპოქაშიც ის მოღვაწეობდა და დასძინა, რომ განძი საქართველოში ბევრად უფრო დიდ საფრთხეში იყო, ვიდრე ერთი კარგი კაცის ხელში – საფრანგეთში. მან იმდროინდელ ეროვნულ ცნობიერებას გაუსვა ხაზი და დასვა კითხვა სტუდენტების მიმართ ,,რატომ ხდება, რომ რომელიღაც წლებში ქართველი ერი წყვეტს, რომ საბჭოთა ხელისუფლებისგან გადამალოს განძი და იგივე ხელისუფლების პერიოდში წყვეტს, რომ სამშობლოში დააბრუნოს?“
საუბრის დასასრულს მან განათლების მნიშვნელობაზე ისაუბრა და გულისტკივილი გამოთქვა ბოლოდროინდელ დამოკიდებულებაზე, რომ საზოგადოების ნაწილს მიაჩნია სარწმუნოება სამუზეუმო ექსპონატია და არა სულიერი განათლების სიმბოლო.
,,იმას, რასაც ამ უნივერსიტეტში აკეთებთ ეს არის განათლება“ განაცხადა მან ქართული უნივერსიტეტის საკონფერენციო დარბაზში.
გამომსვლელთა შორის XX საუკუნის პირველი ნახევრის საინტერესო ნიუანსებზე პროფესორმა ვახტანგ გურულმა ისაუბრა.
კონფერენციამ თითქმის ორ საათს გასტანა და საქართველოს საპატრიარქოს წმიდა ანდრია პირველწოდებულის სახელობის ქართულ უნივერსიტეტში წმიდა ექვთიმე ღვთისკაცის (თაყაიშვილი) სახელობის აუდიტორიის გახსნით დასრულდა.
08.10.13
გიორგი ჩუბინიძე
