ამერიკელი მეცნიერები აცხადებენ, რომ ყავის სახეობათა 60%-ზე მეტი გაქრობის საფრთხის წინაშეა. ამჟამად მსოფლიოში ყავის 124 სახეობა არსებობს და მათი 60%-ს გადარჩენა სჭირდება.
შესაბამის ინფორმაციასა და სტატისტიკურ მონაცემებს სამეცნიერო გამოცემა Science Advances ავრცელებს. ყავის სახეობათა უმეტესობისთვის მთავარ საფრთხეს პარაზიტები, სოკოები, დაავადებები და კლიმატური ცვლილებები წარმოადგენს.
პირველ რიგში, ეს ეხება მცენარეებს, რომლებიც დაცულ ტერიტორიებზე არ იზრდება. “ყავის ველურ ჯიშებს ყავის კულტურის განვითრებაში უმნიშვნელოვანესი წვლილი შეაქვს და მათი არსებობა აუცილებელია საკმარისი რაოდენობით ყავის წარმოებისთვის. მიუხედავად ამისა, მსოფლიოში ნაკლებად არის გავრცელებული მათი გადაშენების რისკებთან და დაცვის პრიორიტეტულ სტატუსთან დაკავშირებული ინფორმაცია”, – ნათქვამია პუბლიკაციაში.
100-ზე მეტი სხვადასხვა სახეობის ყავა ველურ ბუნებაში იზრდება, თუმცა, როგორც წესი, მსოფლიოში ძირითადად ორი სახეობის ყავას – არაბიკასა და რობუსტს – სვამენ. განსხვავებული გემოები ამ სახეობებში სხვა ჯიშის ყავების გარევით მიიღება.
ყავის 75 სახეობა ამჟამად გადაშენების პირასაა, 35 ყავის ჯიშს საფრთხე არ ემუქრება, დანარჩენი 14 ჯიშის შესახებ კი იმდენად ცოტა რამაა ცნობილი, რომ დასკვნების გაკეთება შეუძლებელია.
