„ჩემი პირველი ემოცია და განწყობა არის ის, რომ მე ამ შეხვედრის შინაარსით და ფორმატითაც და იმითაც, რომ მქონდა შესაძლებლობა მესაუბრა ჩემს არგუმენტებს და პოზიციებზე იმდენი ხანი, რამდენიც მჭირდებოდა, კმაყოფილი ვარ. კარგი და საჭირო შეხვედრა იყო. პარტიის თავმჯდომარე, ბიძინა ივანიშვილი უწევდა მოდერატორობას ამ სხდომას და რამდენიმე ადამიანს გვქონდა შესაძლებლობა გვეთქვა რა არის ჩვენი განსხვავებული და კრიტიკული მოსაზრება, რომელიც ეხება იმ 10- კაციან სიას, მოსამართლეებს და ა.შ.“, – განაცხადა ეკა ბესელიამ.
მისივე თქმით, სხდომაზე ბევრი გამომსვლელი იყო და სხდომები კიდევ გაგრძელდება.
„ეს შეხვედრა ხვალ გაგრძელდება. საუბრის შინაარსზე ვერ ვისაუბრებ, მაგრამ არ მაქვს უკმარისობის განცდა, რომ რამის თქმა ვერ მოვახერხე. ჩემი პოზიცია არც დახურულია და არც კონფიდენციალური. მე მაქვს იგივე პოზიცია რაც მქონდა და რასაც გიზიარებდით, მე ამ პოზიციას არ შევიცვლი. რაც შეეხება არგუმენტებს, თუ როგორ უნდა წარიმართოს პროცესი, ამაზე მსჯელობას გავაგრძელებთ და შევჯერდებით. შევთანხმდით რამდენიმე საკითხზე, რამდენიმე არის პრინციპული, მათ შორის ის, რომ უზენაეს სასამართლოში უნდა იყვნენ მოსამართლეები მაღალი ეთიკით და არ უნდა იყვნენ დაკავშირებული ძალადობრივ სისტემასთან. პროცესი მაქსიმალურად პარლამენტში უნდა გადმოვიდეს, პარლამენტმა უნდა აიღოს მნიშვნელოვანი როლი და დანარჩენზე საბოლოოდ უნდა შევთანხმდეთ, – მე მაქვს ეს პოზიციები და იმედია შევთანხმდებით“, – განაცხადა ეკა ბესელიამ.
