„სამუშაო ჯგუფის პირველ შეხვედრაზე პრინციპების დონეზე განვიხილეთ კრიტერიუმებთან და პროცედურასთან დაკავშირებით წარმოდგენილი წინადადებები, შემდეგ შეხვედრაზე უკვე გაგრძელდება დეტალური დისკუსია თითოეულ ნორმასთან დაკავშირებით, რაც უნდა აისახოს კანონპროექტში, რომელიც სამუშაო ჯგუფის მიერ მომზადდება და დაინიცირდება პარლამენტში”,- ამის შესახებ საქართველოს პარლამენტის თავმჯდომარემ სასამართლო რეფორმის სამუშაო ჯგუფის შეხვედრის დასრულების შემდეგ განაცხადა.
შეხვედრაზე უზენაესი სასამართლოს მოსამართლეობის კანდიდატების დასახელების პროცედურასა და კრიტერიუმებზე იმსჯელეს. როგორც ირაკლი კობახიძემ ჟურნალისტებთან საუბრისას აღნიშნა, დღევანდელი შეხვედრის მიზანი პრინციპების განხილვა იყო. მისივე თქმით, საუბარი იყო პრინციპული მნიშვნელობის ყველა დეტალზე.
“რეალურად, იყო საუბარი ყველა დეტალზე, რომელიც პრინციპული მნიშვნელობისაა. დაწყებული იმით, თუ რამდენად უნდა იყოს ღია ის კონკურსი, რომელიც გამოცხადდება, შემდეგ როგორ უნდა იყოს პროცესი იუსტიციის უმაღლეს საბჭოში. როგორ უნდა იყოს მიღებული გადაწყვეტილება საბჭოს მიერ. როგორ უნდა გაგრძელდეს ეს პროცესი შემდეგ პარლამენტში, რამდენი კანდიდატი როგორ უნდა იყოს წარმოდგენილი. ამ ყველაფერზე გვქონდა ჩვენ საუბარი. დღეს, ბუნებრივია, გადაწყვეტილებებს ვერ გამოვაცხადებთ, გამომდინარე იქიდან, რომ მხოლოდ პრინციპების დონეზე გვქონდა საუბარი ამასთან დაკავშირებით. მეორე შეხვედრაზე უკვე გვექნება საშუალება, რომ დეტალურად წარმოგიდგინოთ ის გადაწყვეტები, რომელიც იქნება შემოთავაზებული კრიტერიუმებთან და პროცედურასთან დაკავშირებით”,- განაცხადა პარლამენტის თავმჯდომარემ.
ირაკლი კობახიძე გამოეხმაურა საბჭოს არამოსამართლე წევრებისა და ოპოზიციის წარმომადენლების მიერ სამუშაო ჯგუფის დატოვებასაც. მისი თქმით, ჯგუფის მუშაობაში მონაწილეობის მიღება შესთავაზეს არასამთავრობო ორგანიზაციებს, თუმცა, მათ შეხვედრას ბოიკოტი განოუცხადეს. პარლამენტის თავმჯდომარემ ხაზგასმით აღნიშნა, რომ სამუშაო პროცესი არის ღია და მასში მონაწილეობის მიღება ყველას შეუძლია.
„ რაც შეეხება ორ არამოსამართლე წევრს, საბჭოს არამოსამართლე წევრებს და ასევე, ოპოზიციის წარმომადგენლებს, მათ ისურვეს შემადგენლობის შეცვლა. ჩვენ ამასთან დაკავშირებით დავაფიქსირეთ ღია პოზიცია. ჩვენ მზად ვართ, რა თქმა უნდა, კონსულტაციებისთვის. დავაზუსტებ, ჩვენ შევთავაზეთ არასამთავრობო ორგანიზაციებს მონაწილეობა მიეღოთ მუშაობაში, თუმცა, მათ ბოიკოტი გამოუცხადეს ამ შეხვედრას, არ მიიღეს მონაწილეობა. ჩვენ ვართ დღესაც გახსნილი დისკუსიისთვის. თუ ვინმეს სურს დამატებით წვლილი შეიტანოს სამუშაო ჯგუფის მუშაობაში, ჩვენ ამისათვის მზად ვართ და ამასთან დაკავშირებითაც გვექნება განხილვა იქამდე, ვიდრე შედგება სამუშაო ჯგუფის მეორე შეხვედრა. აქედან გამომდინარე, არის აბსოლუტურად გახსნილი პროცესი. ყველას შეუძლია მონაწილეობის მიღება და ასეთი გახსნილი პროცესის საფუძველზე შემუშავდება საბოლოოდ კანონპროექტი”,- განაცხადა პარლამენტის თავმჯდომარემ.
ჟურნალისტის კითხვის პასუხად, ირაკლი კობახიძემ განაცხადა, რომ სასამართლო ხელისუფლება დამოუკიდებელია და პარლამენტის თავმჯდომარე მოკლებულია უფლებას, შეუერთდეს არასამთავრობო ორგანიზაციების პოლიტიკურ მოთხოვნას, თანამდებობა დატოვოს იუსტიციის უმაღლესი საბჭოს 11-მა წევრმა.
„ სასამართლო ხელისუფლება არის დამოუკიდებელი. შესაბამისად, პარლამენტის თავმჯდომარე მოკლებულია ყოველგვარ უფლებას, რომ შეურთდეს პოლიტიკურ მოთხოვნას, რომც იზიარებდეს თეორიულად. არ გვაქვს არანაირი უფლება და შესაძლებლობა, რომ შევუერთდე ასეთ პოლიტიკურ მოთხოვნას, რომელიც არის წარმოდგენილი ორგანიზაციების მხრიდან”, – განაცხადა პარლამენტის თავმჯდომარემ და კიდევ ერთხელ აღნიშნა, რომ „ სასამართლო არის დამოუკიდებელი. ჩვენი ვალია გავუფრთხილდეთ სასამართლოს დამოუკიდებლობას და ვმუშაობთ ამ პრინციპის შესაბამისად”.
ირაკლი კობახიძის თქმით, კონკრეტულ საკითხებთან დაკავშირებით, გადაწყვეტილებები სამუშაო ჯგუფის მეორე შეხვედრის შემდეგ გამოცხადდება.
მისივე განცხადებით, მომდევნო შეხვედრა, სავარაუდოდ, ერთ კვირაში გაიმართება.
„ ჩვენ წარვმართავთ პროცესს ისე, როგორც არის ეს რაციონალური, პრაგმატული. დღეს გვქონდა ზოგად პრინციპებზე მსჯელობა და ამის შემდეგ უკვე გვექნება მსჯელობა დეტალებთან დაკავშირებით და როგორც უკვე აღვნიშნე, მეორე შეხვედრაზე უკვე შეგვეძლება, რომ წარმოგიდგინოთ გადაწყვეტილებებიც დეტალებთან დაკავშირებით. ვფიქრობ, რომ მომდევნო კვირის ბოლომდე შევძლებთ ჩვენ მეორე შეხვედრის ჩატარებას. შესაბამისად, სესიის დაწყებამდე გარკვეული მონახაზი გვექნება კანონპროექტთან დაკავშირებით”,- განუცხადა პარლამენტის თავმჯდომარემ ჟურნალისტებს.
