ზაფხულის ცხელ დღეებს თან ახლავს ქვეწარმავლები და მათგან გამოწვეული შიში. მათი გავრცელება სხვადასხვა ფაქტორზეა დამოკიდებული. ნებისმიერ შემთხვევაში, ადამიანებმა უნდა ვიცოდეთ, რა მოცემულობაში როგორ უნდა მოვიქცეთ, რომ მათი თავდასხმა ავირიდოთ. მნიშვნელოვანია, რომ ჩვენმა არასწორმა მანევრმა გამოუსწორებელ შედეგამდე არ მიგვიყვანოს.
უფრო დეტალურად, არსებულ საკითხზე თბილისი თაიმსს“ ცხოველთა მონიტორინგის სააგენტოს ხელმძღვანელი, ვახტანგ ლომჯარია ესაუბრა.
„არაფერი განსაკუთრებული წელს არ ხდება. ჩვეულებრივ, მთელი საქართველოს არის ქვეწარმავლების გავრცელების არეალი. მსოფლიოში არის გამონაკლისი ადგილები, სადაც ისინი არ არსებობენ. ჩვენს ქვეყანაში როგორც კი ტემპერატურა იმატებს, ქვეწარმავლების გადაკვეთა ადამიანებთან ხდება უფრო ხშირი“, – განაცხადა ლომჯარიამ ჩვენთან საუბრისას.
მისივე შეფასებით, არსებობს რეგულაციები, რომლების მოსახლეობამ უნდა იცოდეს.
„თუ ქვეწარმავალს დავინახავთ, არავითარ შემთხვევაში მისი მიმართულებით არ უნდა წავიდეთ. არ უნდა დავუწყოთ თამაში და წვალება – პირიქით, ავარიდოთ თვალი და ნაბიჯები უკან გადავდგათ.
ჩვენ მიერ დაჭერილი ქვეწარმავლების დიდი რაოდენობა არის არაშხამიანი და მათი 80% არის გველხოკერა – იგივე უფეხო ხვლიკი, რომელიც ადამიანისთვის საფრთხეს არ წარმოადგენს. ზოგს, ცხადია, უჭირს შხამიანისა და არაშხამიანის გარჩევა, მაგრამ თავის დაზღვევისთვის ჯობს, რომ, უბრალოდ, მათი მიმართულებით არ ვიმოძრაოთ“, – განმარტავს ვახტანგ ლომჯარია.
როგორც ის ამბავს, საქართველოში ერთადერთი რეალური საფრთხე გიურზაა, რომელიც შესაძლებელია, გამორჩეული ფიზიკური მახასიათებლებით გავარჩიოთ.
თუკი ქვეწარმავალს თბილისის ტერიტორიაზე შევნიშნავთ, ჩვენ გვაქვს შესაძლებლობა, ვისარგებლოთ სააგენტოს, რომელიც 24 საათის მანძილზე მუშაობს მობილური ჯგუფებით და იცავს მოქალაქეებს მოსალოდნელი საფრთხეებისგან.
ლომჯარიამ „თბილისი თაიმსთან“ საუბრისას კომენტარი იმის შესახებაც გააკეთა, თუ საქართველოს რომელი ნაწილია უფრო აქტიურია ქვეწარმავლების გავრცელების მხრივ. მისი თქმით, ამ კუთხით აღმოსავლეთ ნაწილი შედარებით აქტიურია და დასავლეთში შხამიანი ქვეწარმავლები თითქმის არ გვხვდება – ძალიან იშვიათად და იშვიათი სახეობები. ეს დამოკიდებულია იმაზე, რომ აღმოსავლეთ საქართველო გაცილებით ცხელი და მშრალია. მაგრამ არსებობს სახეობები, რომლებიც მდინარის არეალში ბინადრობს.
„მოსახლეობამ უნდა იცოდეს შემდეგი – უნდა გაასუფთაოს ტერიტორია, ეზოები, სადაც შეიძლება, იყოს ბევრი არასაჭირო ნივთი – წლების მანძილზე დაგროვებული – უფრო მეტად, ასეთ ადგილებში ბუდობენ ქვეწარმავლები. ბალახი დაბალზე უნდა შევკრიჭოთ და დავიცვათ სანიტარული პირობები. სადაც არიან მღრღნელები, მათ აუცილებლად მოჰყვება ქვეწარმავლები, რადგან ისინი სწორედ მღრღნელებით იკვებებიან“, – განმარტავს ლომჯარია.
როგორც ვახტანგ ლომჯარია ამბობს, ქვეწარმავლები დადებით ფუნქციასაც ასრულებენ სოფლის მეურნეობისთვის, იგივე, მღრღნელების შესამცირებლად.
„რა თქმა უნდა, მოსახლეობის დიდ ნაწილს გაუცნობიერებლად ეშინია და ეს გასაგებია – ვერავის გაამტყუნებ. მთავარია ის, რომ თუ ოთახში შევნიშნავთ ქვეწარმავალს, ჯობს, გავერიდოთ, კარი გავიხუროთ და დაველოდოთ შესაბამის სამსახურს. თუკი მისი მიმართულებით წავალთ, დიდი ალბათობით, განახორციელებს თავდასხმას. არის პერიოდები, როდესაც ისინი განსაკუთრებულად აგრესიულები არიან.
ყველაზე სწორი გადაწყვეტილებაა გარიდება. თუ მოხდა თავდასხმა, უნდა მივმართოთ უახლოეს ადგილობრივ კლინიკას და პროფესიონალი შეაფასებს სიტუაციას. თუმცა, შხამიანი და არაშხამიანი ქვეწარმავლების ნაკბენი ერთმანეთისგან განსხვავდება და გარჩევა არცთუ ისე რთულია“, – განმარტავს ვახტანგ ლომჯარია.
ავტორი: მარიამ ტიელიძე
