ჩვენ გარშემო ბევრი ნიჭიერი , შემოქმედებითი უნარებით დაჯილდოვებული ადამიანი ცხოვრობს. მათ სურვილი აქვთ საკუთარი ნიჭი ბიზნესად გადააქციონ და საზოგადოებას მათი შრომის შედეგი უფრო ახლოს გააცნონ. ბიზნესის დაწყება, თუნდაც სტარტაპის ფორმით საკმაოდ რთულია, ბევრ დროს, ენერგიას და გარემოში ხელსაყრელი პირობების არსებობას მოითხოვს. განსაკუთრებით რთულადაა საქმე რეგიონებში, სადაც სოციალურ- ეკონომიკური ფონი მეტწილად უქმნის დამწყებ ბიზნეს საფრთხეებს.
მიუხედავად სირთულეებისა, ბევრი შემოქმედი ადამიანი იბრძვის, არ ნებდება და მიზანს აღწევს. დაუღალავი შრომისა და მონდომების ნათელი მაგალითია ანა ნიკოლაძე, 36 წლის დიზაინერი ქუთაისიდან. ანამ დაასრულა ა.წერეთლის უნივერსიტეტის ტანსაცმლისა და ფეხსაცმლის მოდელირებისა და დიზაინის ფაკულტეტი. მალევე დაიწყო მუშაობა ფეხსაცმლის პატარა საამქროში და მესამე კურსიდან მიიღო საკუთარ საქმიანობაში პრაქტიკული გამოცდილება. მალე ანამ ცნობილი ფეხსაცმელების ფაბრიკიდან – ლევანტო მიიღო შემოთავაზება და ეს შანსი გამოიყენა, როგორც განვითარებისა და კარიერული ზრდის საშუალება. დღეს ანა ხელნაკეთ ნივთებს ამზადებს, მისი შემოქმედებითი შრომის შედეგი მრავალფეროვანია და ის ამზადებს როგორც ტყავის ნივთებსა და ფეხსაცმელებს, ასევე ხელნაკეთ აქსესუარებსა და საფულეებს , რომლებსაც ფეისბუქის გვერდის საშუალებით არეკლამებს. თუმცა დიზაინერი რეგიონში არსებულ სირთულეებზე ამახვილებს ყურადღებას და თავის სამომავლო გეგმებს თბილისი თაიმსს უზიარებს .
„ ლევანტოში მუშაობის დროს ძალიან დიდი გამოცდილება მივიღე, აქ ვხატავდი ესკიზებს და თარგებსაც ვაკეთებდი .ა ნუ დიზაინის გარდა კონსტრუქტორიც ვარ და ამ ტიპის საქმიანობითაც ვარ დაკავებული, რაც საკმაოდ რთული, მაგრამ საინტერესოა ამავდროულად. აქსესუარებით დაინტერესება უეცრად არ მოსულა. სულ რაღაცას ვკერავდი,ვქსოვდი და ვიგონებდი, სწორედ ამ დროს მომივიდა იდეა, რომ ხელნაკეთი ნივთები შემექმნა და მათთვის სხვადასხვა ფორმა მიმეცა.
შემდეგ ტყავთან რადგან ძალიან მჭიდრო კავშირი მქონდა დავიწყე ჯერ საყურეების გაკეთება, შედეგმა გაამართლა.მანამდე კი ბროშებს და სამაჯურებსაც ვაკეთებდი.
ტყავი ტრენდულია და აქტუალობას არ კარგავს , ამიტომაც გადავწყვიტე ამ მასალასთან მუშაობა არ შემეწყვიტა და დავიწყე ტყავის სამაჯურების,ჩანთების და საფულეების გაკეთება.
აქსესუარებსა და სხვა ტიპის ნივთებზე მუშაობის დროს ჩემთვის დიდი მნიშვნელობა აქვს სამუშაო გარემოს. აუცილებელია რომ იყოს სასიამოვნო მუსიკა. განწყობის მიხედვით მუსიკა განსხვავებულია , ეს მეხმარება მეტად კრეატიული ვიყო და შემოქმედებითობა უკეთ გადმოვიტანო ჩემს ნამუშევრებში. ტყავზე მუშაობა საკმაოდ რთული პროცესია, ალბათ ბევრისთვის გასაკვირია, მდედრობითი სქესის წარმომადგენელი, რომ ტყავის დამუშავებასა და მისგან ნივთების დამზადებაზე მუშაობს, თუმცა უზომოდ საინტერესო პროცედურაა და დიდ სიამოვნებას მანიჭებს. ყველაზე დიდ სირთულეს ტყავის აჭრა წარმოადგენს, რასაც სჭირდება საკმაოდ დიდი ფიზიკური ძალა.
შარშან გამოვუშვი ფეხსაცმლის ჩემი ხაზი A&A shoes. ვაწარმოებ მეგობარ საწარმოში, სადაც ადრე ვმუშაობდი flimoda-ში. ამ ეტაპზე პანდემიის გამო სახლში ვმუშაობ ტყავის აქსესუარებზე. გეგმაში გვაქვს პატარა სახელოსნოს გაკეთება, სადაც ვიმუშავებ ტყავზე. ვგეგმავ ასევე საფულეების და ქამრების შეკერვასაც, მაგრამ ბევრი სირთულეა ამ საქმეში. მასალა ანუ ტყავი საკმაოდ ძვირია და ხელსაწყოების ნაწილიც ჯერ კიდევ საყიდელია, თუმცა მაინც ოპტიმისტურად ვარ განწყობილი და მჯერა ბევრი მონდომებით და შრომით ყველაფერი გამომივა .
ბევრი გეგმა მაქვს, პანდემია და რეგიონში არსებული პრობლემები საქმიანობაში ხელშემშლელი ფაქტორებია. შემიძლია ვთქვა, რომ არაა რეგიონში ხელმისაწვდომ ფასებში მასალები და თბილისში ხშირად წასვლა -წამოსვლა, ფაქტობრივად, შეუძლებელია . ასევე პრობლემები არსებობს ფინანსების მხრივაც. აქ ძვირია ყველაფერი. ამავდროულად ხალხს არ აქვს საშუალება შეიძინოს ესა თუ ის აქსესუარი , არადა ყველას მოსწონს. ასევე პრობლემა არის ისიც, რომ ბევრმა არ იცის ხელნაკეთი ნივთების ფასი და ეს კულტურა ჯერ კიდევ არ არის ჩვენს ქვეყანაში, ეს სტარტაპ ბიზნესმენებს ბევრ გართულებას გვიქმნის.
ბევრი სამომავლო იდეა მაქვს, თუმცა ამ ეტაპზე სამწუხაროდ შეჩერებულია ყველაფერი. ჩემი ყველაზე დიდი სურვილია ვიქირავო პატარა ოთახი , რომელსაც გადავაკეთებ სახელოსნოდ. აქ შევძლებდი ჩემი ამ უამრავი იდეის შესრულებას და განხორციელებას . სახლში კაკუნი უხერხულია და წებოს სუნიც გვაწუხებს. ბევრი იდეა მაქვს და იმედია გაზაფხულისთვის ამ ყველაფრის სისრულეში მოყვანას მოვახერხებ . „
მასალა მოამზადა : ანა ურუშაძემ
