ვისთვის იქმნება თამაშები – ისინი მხოლოდ ბავშვებისთვისაა საინტერესო? დღეს ვცხოვრობთ საუკუნეში, რომელშიც ადამიანები ირჩევენ განსაუთრებულსა და გამორჩეულს. 21-ე საუკუნეში ბევრი რამ იქმნება – მათ შორის, სამაგიდო თამაშები. „თბილისი თაიმსის“ შეკითხვებს GAME SPOT-ის დირექტორი და ქართული სამაგიდო თამაშის – ,,საქმე #X’’-ის იდეის და წესების ავტორი, თემო ბარელაძე პასუხობს.
რატომ გადაწყვიტეთ, გეზრუნათ ქართული თამაშების შექმნაზე?
მოგეხსენებათ, რომ სამაგიდო თამაშები ცნობილია თითქმის ყველა კულტურისა და ცივილიზაციისთვის. ისტორიულ ცნობებზე დაყრდნობით, პირველ სამაგიდო თამაშს ძველ ეგვიპტეში ჯერ კიდევ ძვ.წ. 3500-3100 წლებში თამაშობდნენ. რაც შეეხება საქართველოს, სამწუხაროდ: ნარდის, დომინოსა და ბანქოს გარდა, ბევრისთვის უცნობია სამაგიდო თამაშების კულტურა და აღნიშნული სფერო ჯერ კიდევ არ არის განვითარებული. ჩვენი მიზანიც სწორედ ის გახდა, რომ მოგვეხდინა სამაგიდო თამაშების კულტურის პოპულარიზაცია და ამის საუკეთესო საშუალებად სწორედ ქართული სამაგიდო თამაშის შექმნა გახდა, რომელიც ყველასთვის იქნებოდა ხელმისაწვდომი, მარტივად გასაგები იმ ხიდის გამდები, რომელიც დააკავშირებს საქართველოსა და სამაგიდო თამაშების სამყაროს.
ამ მიმართულებით რამდენად დიდია მოთხოვნა ჩვენს საზოგადოებაში?
როგორც უკვე აღვნიშნე, საქართველოში ფართოდ ცნობადი მხოლოდ სამი სამაგიდო თამაშია. 2000 წლებიდან მოყოლებული, არის მცდელობა ამერიკული და აზიური სამაგიდო თამაშების დამკვიდრების, როგორიცაა: მონოპოლია, მაჯონგი, ქლუედო და სხვა. ასევე, იყო მცდელობები უცხოენოვანი თამაშების თარგმნის, რისი მაგალითიც სამაგიდო თამაში ,,მენეჯერია’’, რომელიც ითარგმნა ზემოთხსენებული ,,მონოპოლიისგან’’. მსგავსი სტილის თამაშები რატომღაც მიაკუთვნეს ბავშვებისთვის განკუთვნილ თამაშებს, რომლებსაც მოზარდები და, მით უმეტეს, ზრდასრულები არ უნდა თამაშობდნენ, რაც აბსურდულია. სამაგიდო თამაშები ერთ-ერთი საუკეთესო საშუალებაა არა მხოლოდ განტვირთვისთვის, არამედ – გონებრივი შესაძლებლობების, დედუქციური აზროვნებისა და გუნდური მუშაობის განსავითარებლად, რომლის ნათელი მაგალითია ჩვენ მიერ შექმნილი ,,საქმე #X’’, სადაც ყველაფერი მხოლოდ მოთამაშეზეა დამოკიდებული და იღბალი ან გამართლება ვერავის დაეხმარება. 2015 წლიდან იგრძნობა პროგრესი და სამაგიდო თამაშების მიმდინარეობით დაინტერესება იზრდება. იქმნება სამაგიდო თამაშების კლუბი, გამოჩნდენ კომპანიები, რომლებიც აქტიურად ამარაგებ ქართულ ბაზარს სხვადასხვა სტილის თამაშებით და ის მოსაზრება, რომ სამაგიდო თამაშებს მხოლოდ ბავშვები თამაშობენ, იმედი მაქვს, მალე წარსულს ჩაბარდება.
უფრო დეტალურად, რას გულისხმობს თამაში, რომლებსაც თქვენ ქმნით?
ამ ეტაპისთვის, GAME SPOT-ს წარმოადგენილი აქვს მხოლოდ ერთი, ლიმიტირებული სამაგიდო თამაში – ,,საქმე#X’’ – რომლის შექმნაზეც მხოლოდ ორმა ადამიანმა – თემო ბარელაძემ და ელენე ჭიღლაძემ იზრუნა. აღნიშნული თამაში არის დეტექტივის ჟანრის, სადაც მოქმედება 1920 წლის თბილისში ვითარდება. მოთამაშეთა რაოდენობა 2-6, ასაკი +12. ჩვენი თამაში აგებულია მხოლოდ ლოგიკასა და სტრატეგიულ მსჯელობაზე, აქ არ შეგხვდებათ კამათლები და ვერ დაეყრდნობით იღბალსა და გამართლებას. თამაშის ყველა კომპონენტი დამზადებულია საქართველოში და მთავარ ღირებულებას წარმოადგენს თბილისის რუკა, რომელიც 1920 წლის თბილისის იდენტურია.
რით არის ის სხვებისგან გამორჩეული?
პირველი და ალბათ ყველაზე მნიშვნელოვანი ისაა, რომ აღნიშნულ პროექტზე მხოლოდ ორი ადამიანი ვმუშაობთ. თამაშის კონცეფციის შექმნა ერთია და მისი რეალიზება და ხორცის შესხმა – მეორე. თუ გაეცნობით ჩვენს კომპანიასა და თამაშს, დაინახავთ, რომ ვიზუალური და გრაფიკული მხარე ძალიან დახვეწილია, რაც GAME SPOT-ის შეუცვლელი წევრის, ელენე ჭიღლაძის დამსახურებაა. ჩვენ არ ვაკეთებთ ცნობილი უცხოური თამაშების პლაგიატს, რომლითაც სამწუხაროდ ძალიან ბევრი ქართული კომპანიაა დაკავებული. ჩვენ ვქმნით 100% -ით ქართულს პროდუქტს, რომელიც გამოირჩევა მაღალი ხარისხით. მინდა, ვისარგებლო შემთხვევით და მადლობა გადავუხადო ყველა იმ კომპანიასა და ადამიანს, რომლებიც გვერდში გვედგნენ და დაგვეხმარნენ ჩვენი მიზნების შესრულებაში.
გაამართლა თქვენმა იდეამ?
თამამად შემიძლია, ვთქვა, რომ გაამართლა. ჩვენ ძალიან ბევრი შეტყობინება მოგვდის, რომლის უმრავლესობაც სამადლობელო შინაარსისაა. ჩვენი თამაშით ყველა კმაყოფილია და მოუთმენლად ელიან შემდეგ პროექტებს. ეს უკუკავშირი ძალიან დიდ სტიმულს გვაძლევს და გვიბიძგებს, გავაგრძელოთ თავდაუზოგავი შრომა და კიდევ ერთხელ გავახაროთ ჩვენი მომხმარებლები. მე მჯერა, რომ ვხდებით ის ადამიანები, რომლებიც საქართველოს განვითარებაში წვლილი შეიტანეს და სულ მალე მსოფლიო აღიარებასაც მოიპოვებენ.
მასალა მოამზადა : მარიამ ტიელიძემ
