გავატაროთ დრო სასიამოვნოდ და გავხადოთ გარემო ჩვენზე მაქსიმალურად მოსარგები – ცხადია, ეს ყველა ადამიანის ყოველდღიური სურვილია. ძალიან კარგია, როცა ამის შესაძლებლობებზე ჩვენ ნაცვლად სხვები ზრუნავენ. „ჩაუფინეს“ გუნდი სწორედ იმ სურვილებს ითვალისწინებს, რომლებიც ჩვენ გვაქვს. დეტალურად, რა შემოთავაზებები აქვს მას – ირინკა აბაშიძე და თაკო ვარამაშვილი , „ჩაუფინეს“ დამფუძნებლები პასუხობენ „თბილისი თაიმსის“ შეკითხვებს.
თავდაპირველად, იდეის შესახებ რომ გვიამბოთ
„ჩაუფინეს“ შექმნის იდეა გაგვიჩნდა პანდემიის პერიოდში – მაშინ, როდესაც საკმაოდ ბევრი შეზღუდვის ფონზე გვიწევდა ცხოვრება. გვინდოდა, შეგვექმნა ისეთი პროდუქტი, რომელიც ცოტათი მაინც მოგვწყვეტდა შექმნილ რეალობას და დაგვიბრუნებდა იმ სიტუაციას, რომელიც ყველასთვის ძალიან საყვარელი და ძვირფასი იყო „ნორმალურ“ ცხოვრებაში.
ბევრი ფიქრის შედეგად, გადავწყვიტეთ, „ჩაუფინე“ ყოფილიყო ყუთი, რომელიც შეინახავდა ყველაზე სახალისო და დასამახსოვრებელ მომენტებს და ჩვენს მომხმარებლებს ცოტა ხნით მაინც დაავიწყებდა არსებულ, საკმაოდ რთულ სიტუაციას.
უფრო კონკრეტულად, რას ითვალისწინებს თქვენი საქმიანობა?
„ჩაუფინე“, როგორც ზემოთ აღვნიშნეთ, არ არის ჩვეულებრივი ყუთი, ის არის ყველასთვის საყვარელი სიტუაცია, რომელში ყოფნაც ყველას ახალისებს და დადებითი ემოციებით ავსებს.
ამ ეტაპზე, გვაქვს ორი სახის ყუთი:
სტანდარტული, რომელშიც დევს: წიპწის არაყი, მისაყოლებლად სხვადასხვა წასახემსებელი და ჩვენ მიერ შექმნილი თამაში – „ჩაუფინე თუ“, რომელიც შედგება 32 ქარდისგან. თითო ბარათზე აღწერილია სხვადასხვა სიტუაცია, რომელიც მორგებულია ჩვენს რეალობას და დალევის პროცესს კიდევ უფრო სახალისოსა და ინტერაქციულს ხდის.
წყვილის ყუთი, რომელშიც მომხმარებელს ხვდება: სპეციალურად წყვილისთვის შექმნილი თამაში „იდეალური წყვილი“, წითელი ღვინის კოქტეილი, „შიკოლის“ შოკოლადები და ვითანამშრომლეთ კომპანია „აიისასთან“, რომელმაც სპეციალურად „ჩაუფინესთვის“ დაამზადა პრეზერვატივები.
ახლა ვმუშაობთ ახალ პროდუქტზე – „ჩაუფინე პიკნიკზე“, რომელსაც სულ მალე შევთავაზებთ ჩვენს მომხარებლებს.
საპიკნიკე ჩანთაში ყველა ის ნივთი დევს, რომელიც პიკნიკზე წასულ მეგობრებს კიდევ უფრო მეტად გაახალისებთ და ერთ ჩვეულებრივ დღეს ფერადსა და მხიარულს გახდის.
როგორ შეაფასებთ, მოთხოვნადი აღმოჩნდა თქვენი შეთავაზება?
იქედან გამომდინარე, რომ „ჩაუფინე“ სულ ცოტა ხანია, რაც ბაზარზეა და საკმაოდ ბევრი შეზღუდვის ფონზე გვიწევს მუშაობა, მომხმარებლების მოთხოვნამ მოლოდის გადააჭარბა, რაც საკმაოდ დიდ მოტივაციას გვაძლევს, რომ საკმაოდ ბევრი და საინტერესო სიახლე შევთავაზოთ მათ.
საქართველოს სრულად მოიცავთ?
ამ ეტაპზე, მხოლოდ სოციალური ქსელითა და „გლოვოს“ აპლიკაციით არის ჩვენი პროდუქციის შეძენა შესაძლებელი. მოთხოვნის შემთხვევაში, ნებისმიერ რეგიონში შეგვიძლია, საკურიერო მომსახურებით მივაწოდოთ ჩვენს მომხმარებელს მისთვის სასურველი – „ჩაუფინეს“ პროდუქტი.
მასალა მოამზადა : მარიამ ტიელიძემ
