მსოფლიოში ვაქცინაციის პროცესი მიმდინარეობს. პარალელურად, კორონავირუსით კვლავ უამრავი ადამიანი ინფიცირდება. ამასთან, მუდმივად მკაცრდება და მსუბუქდება ესა თუ ის რეგულაცია – ეს, ცხადია, აისახება თითოეული ქვეყნის ბიზნესსა და ეკონომიკაზე.
რამდენად მძიმე მდგომარეობაში აღმოჩნდება ჩვენს ქვეყანაში ბიზნესი და ეკონომიკა, თუკი პანდემიის მესამე ტალღა გვექნება – ამის შესახებ “თბილისი თაიმსს” ეკონომიკის ექსპერტი, იოსებ არჩვაძე უსაუბრა.
“პანდემიის პირობებში, ახლანდელი ეკონომიკური კრიზისი, წინა კრიზისებისაგან განსხვავებით, მთლიანად არის სამედიცინო, ბიოლოგიური წარმომავლობის. სწორედ ამ ფაქტორზეა დამოკიდებული კრიზისის სიღრმე და მისი ხანგრძლივობა. აქ უკვე ეკონომისტები მოვლენების რეაგირების რეჟიმში უფრო არიან”, – აღნიშნავს არჩვაძე.
ეკონომისტის განმარტებით. პანდემიის მესამე ტალღის არსებობის შემთხვევაში, ის ისეთივე დამანგრეველი აღარ იქნება ეკონომიკისთვის, როგორიც მეორე ტალღა იყო.
“კაცობრიობამ უკვე შეიმუშავა რამდენიმე ვაქცინა. ამიტომ, მე არ ვფიქრობ, რომ, თუკი პანდემიის მესამე ტალღა იქნება საქართველოსა და მსოფლიოში. ის იქნება ისეთივე მძიმე და მასშტაბური, როგორიც მეორე ტალღა იყო. ეს იმიტომ, რომ ბრძოლისა და მეთოდების გარკვეული გამოცდილება უკვე დავაგროვეთ. უკვე მიმდინარეობს ვაქცინაცია. თუ მესამე ტალღა გვექნება, ეს ნიშნავს ეკონომიკის მასშტაბების კვლავ შემცირებას, რეცესიასა და აღმავლობისა და მდგომარეობის გამოსწორების დროის გადავადებას.
თუმცა, რომ შევაჯამოთ, მე ვფიქრობ, რომ პანდემიასთან შეჯახების, მასთან ადაპტირებისა და მის გვერდით ცხოვრების ყველაზე მძიმე და რთული პერიოდი უკვე გადავიტანეთ. ჩვენ შეგვიძლია, უფრო ოპტიმისტურად ვიყოთ განწყობილნი”, – განაცხადა იოსებ არჩვაძემ.
მასალა მოამზადა : მარიამ ტიელიძემ
