„უვნებლობის თვალსაზრისით, პური რისკჯგუფს არ მიეკუთვნება. ეს იმიტომ, რომ პური ცხვება 240 გრადუსზე. 100 გრადუსზე კი ყველა მიკრობი მკვდარია. რისკებზე საუბარი ზედმეტია“, – ამის შესახებ პურის მცხობელთა ასოციაციის თავმჯდომარემ, მალხაზ დოლიძემ „თბილისი თაიმსთან“ საუბრისას განაცხადა.
დოლიძემ „კარტოფილის დაავადების“ შესახებ ისაუბრა.
„პური, როგორც პირველადი მოხმარების პროდუქტი, სურსათის უვნებლობის თვალსაზრისით, უვნებელია. ერთადერთი, არის “კარტოფილის დაავადება”, რომელიც ზაფხულში ჩნდება. ის უჩნდება ისეთ პურს, რომელშიც არის კარტოფილის ჩხირები. იმ პურს არათუ ადამიანი, ვერავინ და ვერაფერი მიირთმევს. ეს დაავადება საქართველოს გარდა სხვა ქვეყნებშიც არის. თუმცა, ის მხოლოდ ზაფხულის დაავადებაა. ის ჩხირები ვერ უძლებს სიმჟავეს. პურში კი სიმჟავე მაღალი არ არის, 5 გრადუსამდეა.
სამწუხაროდ, უბედურება არის ის, რომ ამ მიმართულებით მუშაობს ძალიან ბევრი დილეტანტი. დარგში უნდა იყოს განათლება და გათვითცნობიერება. აქ უნდა ვიცოდეთ ცოტა ბიოლოგია, ცოტა ტექნოლოგია. განათლებაში მოვიკოჭლებთ. მაგალითად, გერმანიაში რომ პურის ცხობის მიმართულებით იმუშაო, რამდენიმეთვიანი განათლება მაინც უნდა მიიღო და შემდეგ მოგანიჭებენ შესაბამის სტატუსს“, – განმარტა ასოციაციის თავმჯდომარემ.
მასალა მოამზადა : მარიამ ტიელიძემ
