საქართველოს პრემიერ-მინისტრის, ირაკლი ღარიბაშვილის განცხადებით, მთავრობა მზადაა, თურქეთს, სადაც ტყის ხანძარი მძვინვარებს, ნებისმიერი სახის დახმარება გაუწიოს.
“გულისყურით ვადევნებთ თვალს ჩვენი მეგობარი ქვეყნის, სტრატეგიული პარტნიორის, თურქეთის სამხრეთ რეგიონებში ტყის მასშტაბური ხანძრის შესახებ გავრცელებულ ცნობებს. გულწრფელ სამძიმარს გამოვხატავ და თანავუგრძნობ ჩვენს მეგობარ თურქეთს ხანძრის შედეგად გარდაცვლილი ადამიანების და იმ ზიანის გამო, რომელიც თურქეთს მიადგა. საქართველო სოლიდარობას უცხადებს თურქეთის მთავრობას და მოსახლეობას ამ განსაცდელის ჟამს. საქართველოს მთავრობის სახელით, მზად ვარ, მეზობელ თურქეთს ნებისმიერი სახის დახმარება აღმოვუჩინო”, – აღნიშნულია ირაკლი ღარიბაშვილის მიერ გავრცელებულ განცხადებაში.
შეგახსენებთ, რომ 29 ივლისიდან თურქეთში ტყის ხანძარი მძვინვარებს. სტიქიის შედეგად 6 ადამიანი დაიღუპა.
