თითოეულ ჩვენგანს აქვს საკუთარი გემოვნება. სხვებისგან გამორჩეული იდეები, სურვილები და მიზნები. ამ ყველაფრის გათვალისწინებით,არსებობს სამყაროში მოცემულობები, რომლებიც გვაძლევს სტიმულს. რაც უფრო ახლობელია ეს მოცემულობა ჩვენთვის, მით მეტად გვიყვარს.
„ლილიტი“ სწორედ ასეთ აქსესუარებს ქმნის – ისეთს, რომელიც ჩვენთვის ძალიან პირადულია და თავად ადამიანს ასახავს. დეტალებზე „თბილისი თაიმსს“ მისი დამფუძნებელი, ნინიკო თორაძე ესაუბრა.
„ლილიტი“ არის ბრენდი, რომლის მთავარი მიზანია, აქსესუარებით გოგონებს შთავაგონოთ თავდაჯერებულობა, საკუთარი თავის სიყვარული და შევახსენოთ, რომ ყველაფრის მიღწევა შეუძლიათ, რასაც მოინდომებენ და მიზნად დაისახავენ.
ამჟამად, ძირითადად, ვამზადებთ ხის ფერად გულსაბნევებს, რომლის მთავარი გმირები არიან ძლიერი, საინტერესო, უნიკალური გოგონები წიგნებიდან, ფილმებიდან, სერიალებიდან…“
რა წარმოადგენს „ლილიტის“ მთავარ მიზანს?
„ლილიტის“ სლოგანი, რომელიც შეფუთვაზეცაა გამოსახული, არის – „იყავი საკუთარი თავის გმირი“. ამის მთავარი მიზეზეზი არის ის, რომ, ჩემი აზრით, არ უნდა დაველოდოთ სხვებს, როდის „გადაგვარჩენენ“. ჩვენვე უნდა გადავდგათ პირველი ნაბიჯები ჩვენი მიზნების განხორციელებისაკენ, შემდეგ კი მჯერა, ყველაფერი გამოვა. ჩვენს აქსესუარებს ასევე თან ვაყოლებთ ფერად კონვერტებს წერილით ან ბარათებს, სადაც ვუწერთ პატარა პოზიტიურ და სამოტივაციო მესიჯს.
როდის გადადგით, ამ მხრივ, პირველი ნაბიჯები?
2017 წელს, ჩემი 20 წლის იუბილის წინა დღეს ვფიქრობდი, რისი მიღწევა მინდოდა ცხოვრებაში. მივხვდი, რომ მინდოდა, დამეწყო ჩემი ბიზნესი. მსურდა ლამაზ, ესთეტიკურ პროდუქციის შექმნასთან ერთად პოზიტიური გავლენა ჰქონოდა პროდუქციას ჩემნაირ ამბიციურ გოგონებზე, რომლებსაც დროდადრო სჭირდებათ შეხსენება, რომ ისინი არიან საკუთარი თავის გმირები და შეგვიძლია სტერეოტიპების დამსხვრევა.
დაახლოებით, ერთი წელი დამჭირდა იმისთვის, რომ სახელი შემერჩია, ლოგო მომეფიქრებინა, პირველი პროდუქცია განმეთავსებინა სოციალურ ქსელში. მას მერე სხვადასხვა ადგილობრივ და საერთაშორისო პროექტში მივიღე მონაწილეობა. ეს პროექტები ძალიან დამეხმარა, დამეხვეწა იდეაც და პროდუქციაც.
თუ გეგმავთ, პროდუქცია კიდევ უფრო მრავალფეროვანი გახადოთ?
რამდენიმე თვის წინ ბიზნეს გრანტი ავიღე და საშუალება მაქვს, გავამრავალფეროვნო პროდუქცია. ახალი აპარატურის გამოყენება ისეთი ადვილი არ აღმოჩნდა, როგორიც მეგონა, თუმცა, თანდათან ვსწავლობ გამოყენებას და დაახლოებით ერთ თვეში დავამატებთ ჩანთებს, მაისურებს, ტელეფონის ქეისებს…
ძალიან ბევრი სამომავლო გეგმა მაქვს. პირველ ყოვლისა, მინდა, უფრო მეტ ადამიანს გავაცნოთ „ლილიტი“ როგორც საქართველოში, ისე ჩვენს საზღვრებს გარეთ. ვფიქრობ, საერთაშორისო ბაზარზეც შეიძლება, საინტერესო იყოს ჩვენი აქსესუარები და ბრენდის კონცეფცია.
სამუშაო ნამდვილად ბევრია და ნელ-ნელა ვცდილობ, წინ წავიდე. განვითარებში ძალიან ბევრი ადამიანი მეხმარება, დაწყებული ოჯახის წევრებით, დამთავრებული კმაყოფილი მომხმარებლებით, რომლებიც ძალიან დიდ მოტივაციას მაძლევენ, რომ არ გავჩერდე. ყველასი ძალიან მადლიერი ვარ.
თქვენი ნამუშევრების შეძენა სად არის შესაძლებელი?
ამჟამად, ჩვენი პროდუქციის ნახვა რამდენიმე მაღაზიაშიც შეგიძლიათ: ახალი აღმაშენებლის N14ში მაღაზია “არტ-სიმფონიაში”; ექვთიმე თაყაიშვილის N1ში (თსუს მეორე კორპუსის პირდაპირ) მაღაზია “იდეაში”; თამარ ჭოველიძის N3-ში (სასტუმრო რუმსის მიმდებარედ) მაღაზია “სამალავში”; ანა პოლიტკოვსკაიას N3-ში ყვავილების მაღაზია “ანემონეში”
ასევე, პროდუქციის დათალიერება და შეძენა შეგიძლიათ სოციალურ ქსელებში.
მასალა მოამზადა : მარიამ ტიელიძემ
