ავღანეთიდან 23-ე ბატალიონის კიდევ ერთი ნაკადი დაბრუნდა. როგორც “თბილისი თაიმსს” თავდაცვის სამინისტროდან აცნობეს, 23-ე მსუბუქი ქვეითი ბატალიონის მორიგი ნაკადი ავღანეთიდან სამშობლოში დღეს დილით დაბრუნდა. 23-ე ბატალიონი 4 თვის განმავლობაში ბაზა “ლეზერნეკზე” ამერიკული კონტინგენტის შემადგენლობაში ასრულებდა ISAF-ის მისიას.
23-ე ბატალიონი ბოლო ქართული ქვედანაყოფია, რომელიც ISAF-ის მისიის ფარგლებში, ჰელმანდის პროვინციაში საბრძოლო დავალებებს საქართველოს დროშის ქვეშ ასრულებდა. ავღანეთში ქართველი სამშვიდობოები ამერიკული კონტინგენტის შემადგენლობაში იღებდნენ მონაწილეობას. ისინი კოალიციურ ძალებთან ერთად, 4 თვის განმავლობაში სრული სპექტრის ოპერაციებს ახორციელებდნენ.
150 სამხედრო მოსამსახურეს საქართველოს შეიარაღებული ძალების მთავარი სერჟანტი ალუდა კოპალიანი და მეორე მსუბუქი ქვეითი ბრიგადის მეთაური, ვიცე-პოლკოვნიკი ზაზა ჩხაიძე ალექსეევკას სამხედრო აეროდრომზე დახვდნენ. მათ ქართველ სამხედროებს საქართველოში დაბრუნება მიულოცეს და ISAF-ის მისიის წარმატებით განხორციელებისთვის მადლობა გადაუხადეს.
23-ე ბატალიონი ავღანეთში მისიის შესასრულებლად როტაციის წესით აპრილში გაემგზავრა. მეორე ქვეითი ბრიგადის ჯარისკაცები ავღანეთში საბრძოლო ამოცანას მეორედ ასრულებდნენ და ორივეჯერ უდანაკარგოდ დაბრუნდნენ. თვის ბოლოსთვის ქვედანაყოფის სამხედროები სამშობლოში სრულად დაბრუნდებიან.
25.07.14
