დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, ფულადმა წახალისებამ ასაკობრივ ჯგუფებში ვაქცინაციაზე მიმართვიანობა საგრძნობლად გაზარდა.
როგორც გამყრელიძემ დღეს საკოორდინაციო საბჭოს შემდეგ გამართულ ბრიფინგზე განაცხადა, იგი ფულად წახალისებას „ბუსტერ“ დოზის შემთხვევაშიც ემხრობა და ამ წინადადებით ფინანსთა მინისტრს უკვე მიმართა.
„200-ლარიანმა ფულადმა წახალისებამ იმუშავა, რაც ნოემბრის ბოლოს დაწესდა. დამატებით 125 ათასი 60+ ასაკის მოქალაქე აიცრა. მუშაობს 50+ ასაკის მოქალაქეებშიც. დეკემბერთან შედარებით სამჯერ გაიზარდა, როცა 200-ლარიანი წახალისება 50 წელს ზემოთ მოქალაქეებისთვის ძალაში პირველ იანვარს შევიდა.
გიდასტურებთ, რომ მე თვითონ ვემხრობი ასევე და დღეს დავაყენე ეს საკითხი ფინანსთა მინისტრის წინაშე, რომ თუ შესაძლებელია იყოს „ბუსტერზეც“. თუ ჩვენ „ბუსტერიზაციას“ სერიოზულად გავზრდით, ეს სერიოზულად შეამცირებს „ომიკრონის“ ტალღის სიმძაფრეს“, – განაცხადა გამყრელიძემ.
