ვიცე-მერი ირაკლი ხმალაძე მიკროავტობუსების ჩანაცვლების საკითხს და „თბილისის მიკროავტობუსში“ გაკეთებულ განცხადებას კიდევ ერთხელ გამოეხმაურა.
ხმალაძის თქმით, მიკროვტობუსების კომპანიას ნამდვილად აქვს ფინანსური პრობლემები, რაც გამოიხატება იმაში, რომ მათ ვალუტის კურსიდან, ასევე, საწვავის ფასიდან გამომდინარე, დაგეგმილი შემოსავლები ვერ მიიღეს.
მისივე განმარტებით, აღნიშნული პრობლემები ახალი არ არის.
„საზოგადოებამ აუცილებლად უნდა იცოდეს, რომ მიკროვტობუსების კომპანიას ნამდვილად აქვს ფინანსური პრობლემები. ეს გამოიხატება იმაში, რომ მათ დაგეგმილი შემოსავლები ვერ მიიღეს კურსიდან და საწვავის ფასიდან გამომდინარე. რა თქმა უნდა, მნიშვნელოვანია ისიც, რომ ეს პრობლემები არ დაწყებულა წელს და შარშან. სამწუხარო ფაქტი არის ის, რომ მუნიციპალიტეტის არც ერთმა მენეჯმენტმა არ მოისურვა პრობლემების მოგვარება. როცა პრობლემას არ გასცემ პასუხს, დამძიმდება და ოდესღაც უფრო მძიმე მოცემულობის გადაწყვეტა მოგიწევს. ახლა გვაქვს ეს მძიმე მოცემულობა“ ,- განაცხადა ირაკლი ხმალაძემ.
რაც შეეხება მიკროავტობუსების მფლობელ კომპანიასთან მოლაპარაკებების დროს უთანხმოებას, ვიცე-მერის განმარტებით, ეს ზარალის თაობაზე კომპანიის განცხადებას უკავშირდება.
„კომპანიასთან ჩემი უთანხმოება მდგომარეობს იმაში, რომ კომპანია აკეთებს განცხადებებს, რომ მიიღეს ზარალი. ხარჯები და შემოსავლები არის ერთმანეთის საპირწონე. ამაზე აუდიტორული დასკვნა მზადდება და რეკომენდაციებს იძლევა, რომ იაფი სესხის ჩადება მოხდეს კომპანიაში, გარკვეული კაპიტალის მოძიება და ტარიფის გადახედვა მოხდეს, რა თქმა უნდა, ყველა რეკომენდაცია ვერ შესრულდება და არ შესრულდება. თუმცა გამოვდივართ იმ მოცემულობიდან, რომ მიკროავტობუსები უნდა შეიცვალოს. კომპანია ჯერჯერობით ზარალზე არ არის. ისინი ზარალს ეძახიან მიუღებელ შემოსავალს. ისინი მუშაობენ ნულოვან მოგებაზე. ხარჯავენ იმდენს, რამდენიც შემოსავალი აქვთ. მათთვის დამატებითი ფინანსური ვალდებულება, რომ ახალი მიკროავტობუსები იყიდონ, ეს გაარღვევს კომპანიას, მაგრამ განსხვავებული ვარიანტებია მოსაძებნი“ ,- განაცხადა ირაკლი ხმალაძემ.
ამასთან, ირაკლი ხმალაძე აცხადებს, რომ „სითი პარკის“ ბედს კომპანია ვერ გაიზიარებს.
რაც შეეხება ტარიფს, „თბილისის მიკროავტობუსი“ ავტოპარკის განახლების შესაძლებლობას მხოლოდ ტარიფის ზრდის შემთხვევაში ხედავს. ხმალაძე განმარტავს, რომ თუ კომპანია მოგებას ვერ ნახულობს, ტარიფის ზრდა მართლაც გამოსავალია, თუმცა, მისივე თქმით, როცა მერია ხალხს მოუწოდებს, კერძო მანქანებით არ გადაადგილდნენ, საზოგადოებრივი ტრანსპორტის ტარიფის ზრდა გაუმართლებელია.
„თუ თქვენ გულისხმობთ იმას, რომ კომპანია გავაგდოთ და სხვა შემოვიყვანოთ, ეს სამართლიანი გადაწყვეტილება არ იქნება. ტარიფის ზრდას რაც შეეხება, აუდიტორიც ამ რეკომენდაციას იძლევა და ჩვეულებრივ შემთხვევაშიც ეს ყველაზე სწორი გამოსავალია, როდესაც კომპანია მოგებას ვერ ნახულობს გაიზარდოს ტარიფი. მაგრამ არსებობს სხვა ალტერნატივებიც. როდესაც ატარებ საზოგადოებრივი ტრანსპორტის პოლიტიკას და ხალხს მიუწოდებ, გააჩერო კერძო მანქანები სახლებთან, ამ დროს საზოგადოებრივი ტრანსპორტის ტარიფის ზრდა არ არის სწორი. ეს კიდევ უფრო უკეთებს დრამატიზებას ამ სიტუაციას. ერთი კვირის ვადაში მექნება გეგმა. ტარიფის ზრდა არის ისეთი ვარიანტი, რომელსაც, დიდი ალბათობით, ჩვენ არ დავთანხმდებით. ტარიფის ზრდით ფინანსური პრობლემების მოგვარება არის ყველაზე მარტივი და სწორი გზაც, მაგრამ ვითვალისწინებთ ქალაქის ეკონომიკურ მდგომარეობას და იმ პოლიტიკას, რომელსაც მუნიციპალიტეტი ატარებს. ყველა ვარიანტს განვიხილავ, გარდა ტარიფის ზრდისა“ , – განცხადა ხმალაძემ.
შეგახსენებთ, თბილისის მერმა კახა კალაძემ მიკროავტობუსების საკითხზე პირველად 27 ნოემბერს გამართულ დედაქალაქის მთავრობის სხდომაზე ისაუბრა. კალაძის თქმით, შეგნებულად იკავებდა თავს მიკროავტობუსებთან დაკავშირებით რაიმე სახის განცხადების გაკეთებისგან, ვიდრე ფრანგული კომპანია „სისტრას“ მიერ განხორციელებული საზოგადოებრივი ტრანსპორტის რეფორმის კვლევის შედეგი არ გახდებოდა ცნობილი. მისივე განმარტებით, კვლევამ აჩვენა, რომ ქალაქში მიკროავტობუსების როლი, მათი არსებობა მნიშვნელოვანია. თუმცა, მერის განცხადებით, მიკროავტობუსები, რომლებიც დღეს დედაქალაქში მოძრაობენ, ძალიან ცუდ მდგომარეობაშია.
კალაძემ ვიცე-მერს დაავალა, სასწრაფოდ დაეწყო აქტიური კომუნიკაცია კერძო კომპანიასთან, რომლის მფლობელობაშიც მიკროავტობუსებია. კალაძის განცხადებით, ორი კვირის ვადაში უნდა იყოს წარმოდგენილი კონკრეტული გეგმა, თუ როგორ მოხდება 2020 წლიდან მიკროავტობუსების ჩანაცვლება.
კალაძის განცხადებას იმავე დღეს უპასუხეს „თბილისის მიკროავტობუსში“.
„თბილისის მიკროავტობუსში“ განმარტეს, რომ საქართველოს ბაზარზე ოპერირება 2011 წელს დაიწყეს და გეგმის მიხედვით, შვიდი წლის თავზე ავტოპარკი სრულად უნდა განახლებულიყო. თუმცა „თბილისის მიკროავტობუსის“ გენერალური დირექტორის, დავით ასანიძის თქმით, იმ პერიოდში დოლარის კურსი დაახლოებით, 1.65-ს შეადგენდა და მათი ბიზნეს გათვლაც ამ კურსზე იყო. „თბილისის მიკროავტობუსის“ გენეალური დირექტორის განცხადებით, წინასწარი გათვლებით, დოლარის კურსი 10 ან 20 პროცენტზე მეტად რომ არ შეცვლილიყო, 2018 წელს ყველა სამარშრუტო ტაქსი განახლდებოდა.
დავით ასანიძე ამბობს, რომ დოლარის კურსის ცვლილებამ, რომელმაც, მისივე განმარტებით, კომპანიას დაახლოებით 50 მილიონი ლარის ზარალი მიაყენა, ავტოპარკის განახლებას ხელი შეუშალა. „თბილისის მიკროავტობუსში“ პრობლემების არსებობა არ უარყვიათ. ასანიძის თქმით, მიკროავტობუსები მართლაც ამორტიზირდა, დაძველდა და გამოცვლას საჭიროებს. თუმცა, დავით ასანიძემ განმარტა, რომ პარკის განახლება მხოლოდ მგზავრობის საფასურის გაზრდის ხარჯზე იქნებოდა შესაძლებელი. საკითხთან დაკავშირებით დედაქალაქის მთავრობის დღევანდელ სხდომაზე თბილისის მერმა კახა კალაძემ კიდევ ერთი განცხადება გააკეთა.
