ოდესის ოლქის ყოფილი გუბერნატორი მიხეილ სააკაშვილი უკრაინაში დაბრუნებისთვის იბრძოლებს და პირობას დებს, რომ ქვეყანაში დაბრუნდება.
ამის შესახებ სააკაშვილმა ვიდეომიმართვაში ისაუბრა, სადაც მისთვის უკრაინის მოქალაქეობის ჩამორთმევა შეაფასა.
“ეს უკრაინის საზოგადოებისთვის პირდაპირი სიგნალია – აღარ გაგრძელდება თამაში, სახელად “დემოკრატია”. პოროშენკო საქართველოში ორ ოლიგარქიულ რეჟიმს შორის შეთანხმებისთვის ჩავიდა. შეთანხმებისთვის უკრაინელ პოროშენკოს და “გაზპრომის” უმსხვილეს კერძო აქციონერ, რუსული პროექტის ქართველ ოლიგარქ ივანიშვილს შორის”, – ციტირებს “საზოგადოებრივი” სააკაშვილის სიტყვებს.
მისივე თქმით, სიცრუეა, თითქოს საქართველომ უკრაინას მასთან დაკავშირებით ახალი მასალები გადასცა.
ოდესის ოლქის ყოფილი გუბერნატორი აცხადებს, რომ დევნილის სტატუსის მოპოვებას არ აპირებს.
სააკაშვილის განცხადებით, 24 ივლისს პეტრო პოროშენკომ იმ კომისიის შემადგენლობა შეცვალა, რომელმაც მისთვის მოქალაქეობის ჩამორთმევის გადაწყვეტილება მიიღო.
“პეტრო ოლექსეევიჩ პოროშენკო, მე შემიძლია გითხრათ, რომ ცუდი მრჩევლები გყავთ. ამ განკარგულებით თქვენ და თქვენმა მთავრობამ ხელი მოაწერეთ გარდაუვალ მარცხს. დღეს თქვენ გადაკვეთეთ წითელი ხაზი, თქვენ, როგორც თქვენი წინამორბედი, ცდუნდით, დააკმაყოფილოთ სურვილი ნებისმიერ ფასად. მოქალაქეობა არ არის ცარიელი კონცეფცია, ყოველდღე, როცა უკრაინის მოქალაქის პასპორტით ვიყავი, ვმუშაობდი, რომ უკრაინა წარმატებული და ევროპული სუპერსახელმწიფო გამხდარიყო! მე უფრო ვარ უკრაინელი, ვიდრე ამჟამინდელი დეპუტატები. მე მიყვარს უკრაინა მთელი ჩემი გულით და გავაგრძელებ ბრძოლას ჩვენი უკრაინისთვის”, – აცხადებს მიხეილ სააკაშვილი ვიდეომიმართვაში.
მისივე თქმით, დევნილის სტატუსის მოპოვებას არ აპირებს და იბრძოლებს უკრაინაში დასაბრუნებლად. „ჩემი გული უკრაინას ეკუთვნის, თქვენი ხელმოწერის მიუხედავად“,- მიმართავს სააკაშვილი უკრაინის პრეზიდენტ პეტრო პოროშენკოს.
უკრაინის პრეზიდენტ პეტრო პოროშენკოს ბრძანებით, მიხეილ სააკაშვილს უკრაინის მოქალაქეობა ჩამოერთვა. ამის მიზეზად მოქალაქეობის მიღების პროცედურის დროს არასწორი ინფორმაციის მიწოდება დასახელდა.
ამჟამად სააკაშვილი აშშ-ში იმყოფება.
უკრაინის პრეზიდენტმა 2015 წლის 30 მაისს საქართველოს ყოფილ პრეზიდენტს მიხეილ სააკაშვილს უკრაინის მოქალაქეობა მიანიჭა და იმავე დღეს ოდესის ოლქის გუბერნატორად დანიშნა. 2016 წელს სააკაშვილი დაკავებული თანამდებობიდან გადადგა და უკრაინის ხელისუფლება კორუფციის მხარდაჭერასა და კრიმინალების მფარველობაში დაადანაშაულა. მოგვიანებით, სააკაშვილმა თავისი პოლიტიკური ძალა ჩამოაყალიბა და უკრაინის რადას ვადამდელი არჩევნების ჩატარებისთვის ბრძოლა დაიწყო.
უკრაინის სასამართლომ დღეს კიევის ყოფილი მერის, ამჟამად საქართველოს მოქალაქისა და ქობულეთში მცხოვრები ლეონიდ ჩერნოვეცკის დაპატიმრების ნებართვა გასცა.