იმის გამო, რომ 21-ე საუკუნეში ჩვენ გვაქვს შესაძლებლობა, არჩევანი ძალიან ბევრს შორის გავაკეთოთ, გვაქვს სურვილი, შევარჩიოთ ის, რაც განსხვავებულია. ეს განსაკუთრებით მაშინ, როდესაც საქმე ეხება სივრცეს, სადაც ჩვენ ყოველდღიურად გვიწევს ყოფნა და ეს გარემო დიდი დროის მანძილზე უნდა იყოს ჩვენ თვალწინ.
გიორგი მეტრეველი ხის რგოლებს ამზადებს – რაც მთავარია, ხარისხიანს და ხელმისაწვდომ ფასად. ისინი ნებისმიერ ინტერიერსა და ხელნაკეთ ნივთს განსხვავებულს გახდის. მათთვის, ვისაც აქვს სურვილი, ჰქონდეს სხვებისგან გამორჩეული, ხის რგოლები ძალიან საინტერესო პროდუქტია და უნდა აღინიშნოს, რომ ის ინტერიერს სიმყუდროვეს მატებს.
გარდა ხის მასალისა, ასევე, გიორგი ძალიან ბევრ, ხელით ნაკეთ ნივთს ამზადებს. ჯერ მხოლოდ ერთი თვეა, რაც მან აღნიშნული საქმიანობა წამოიწყო, თუმცა, უკვე თითქმის მთელს საქართველოში, ყველა რეგიონში აქვს გაგზავნილი ხის რგოლები.
“თავდაპირველად, ინტერესი ძალიან დიდი იყო. მხოლოდ ერთ დღეში ხის მასალა ძალიან ბევრ რეგიონში გავგზავნე. შემდგომ, ინტერესმა ნელ-ნელა იკლო. თუმცა, იმ “ფეისბუქ” ჯგუფებში, სადაც ხელოვნებით დაინტერესებული ადამიანები არიან გაერთიანებული, ჩემი მასალა საკმაოდ პოპულარულია.
ამ ყველაფერს მე და ჩემი შეყვარებული ერთად ვაკეთებთ. ის მარკეტინგის მხრივ ძალიან კარგად არის გათვითცნობიერებული, მე კი ვამზადებ და ვგზავნი”, – ამბობს გიორგი და აღნიშნავს, რომ, რამდენადაც მისთვის ცნობილია, მის მიერ წარმოებულ ხის რგოლებს ძალიან ბევრი ხატმწერი ყიდულობს და ხატებს სწორედ მათზე წერს.
“ჩემს უმთავრეს სამომავლო გეგმას წარმოადგენს, რომ ამერიკაში გავიდეს ჩემი წარმოება”, – განმარტავს გიორგი მეტრეველი “თბილისი თაიმსთან” საუბრისას.
მასალა მოამზადა : მარიამ ტიელიძემ
