„ხე კადუ“ – ეს გახლავთ ისტორია, რომელიც სამი წლის წინ დაიწყო. ელენე კუჭუხიძე ახლა 13 წლისაა. თუმცა, როდესაც სათამაშოების შექმნის გადაწყვეტილება მიიღო, 10 წლის იყო. მას გაუჩნდა იდეა, ეწარმოებინა ჯანსაღი, გასართობი, განსხვავებული და ბავშვებისთვის საინტერესო ნივთები. ჯერ იყო პირველი სათამაშო, დღეს კი ელენე მუდმივად ფიქრობს, რა შექმნას ისეთი, რაც მომხმარებლის ყურადღებას მიიქცევს.
„თბილისი თაიმსს“ დეტალებზე ელენე თავად ესაუბრა.
როდის დაიწყო „ხე კადუს“ ისტორია?
სათამაშოების შექმნის იდეა 2019 წელს, 10 წლის ასაკში გამიჩნდა, როდესაც მეგობრებთან ერთად ვმსჯელობდით და ვიხსენებდით, თუ რომელმა სათამაშომ მოახდინა ჩვენზე ყველაზე დიდი შთაბეჭდილება, შეგვაყვარა და დაგვამახსოვრა თავი.
გადავწყვიტე, შემექმნა ისეთი სათამაშო, რომელიც დაუვიწყარ შთაბეჭდილებას მოახდენდა პატარას ცხოვრებაში, განავითარებდა სხვადასხვა დადებით უნარ-ჩვევას და, რაც ყველაზე მნიშვნელოვანია – თამაშის მერეც გააგრძელებდა სარგებლობის მოტანას, რაც ჩემთვის ძალიან მშიშვნელოვანი იყო, რადგან არ მიყვარს უსარგებლოდ დატოვებული, გადაყრილი ან მიტოვებული სათამაშოები.
რა იყო შენი პირველი სათამაშო?
პირველი სათამაშო იყო „ჩიტის სახლი“, რომელსაც საფუძვლად ედო იდეა – პატარას დამოუკიდებლად, უსაფრთხოდ შეძლებოდა ჩიტის სახლის კონსტრუქციის აგება, თავისი გემოვნებით გაფორმება, ამისთვის ყველაფერზე ვიზრუნე და სასაჩუქრე ნაკრებში მოვათავსე: არყის ხის 9 დეტალი, საღებავები, ფუნჯები, პალიტრა, ჩიტის საჭმელი. ჩემი მიზანია, რაც შეიძლებმა ბევრმა პატარამ „ხე კადუსთან“ ერთად შექმნას თავისი საკუთარი – ჩიტის სახლი და იზრუნოს ჩიტებზე.
საინტერესოა, როგორ შეიქმნა ლოგო და რას უკავშირდება სახელწოდება – „ხე კადუ“?
სახელი – „ხე კადუ“ და ლოგო ისევ მეგობრებთან ერთად მოვიფიქრე. მინდოდა – სახელი ბავშვური და ბუნებასთან ასოცირებული ყოფილიყო. არ ვიცი, რამდენად გამომივიდა. აღსანიშნავია, რომ „ხე კადუს“ ლოგოს, აგრეთვე, ყველა სათამაშოს გრაფიკული დიზაინი შექმნილია თაკო ზუკაკიშვილის მიერ.
„ხე კადუს“ შექმნის დღიდან თანამედროვე ქართველი მხატვრების მიერ მოხატულ ჩიტის სახლებს ვაგროვებ. უკვე 20 მხატვრის მიერ მოხატული ჩიტის სახლი მაქვს ჩემს კოლექციაში. ერთ დღეს ვაპირებ, გამოფენა მოვაწყო.
რით გამოირჩევა შენი სათამაშოები?
„ჩიტის სახლს“ მალევე მოჰყვა სათამაშოები: „ჩემი საყვარელი წიგნის თარო“ და „მოდელები“. სათამაშოებს ერთი იდეა აერთიანებთ – პატარები თავისით ქმნიან ნივთებს, რომლებიც თამაშის შემდეგაც „აგრძელებენ სიცოცხლეს“.
რამდენად მნიშვნელოვანია შენთვის სიახლეების შეთავაზება ბავშვებისთვის?
სულ ახლახან დავასრულე მუშაობა ახალ სათამაშოზე – „ახალი თბილისი“. სათამაშო, ძველი თბილისის კოლორიტული სახლების შთაგონებით შეიქმნა (შეიქმნა 12 სახლის ფასადი). სასაჩუქრე ნაკრებს მოყვება: 3 სახლის ფასადი, საღებავები, ფუნჯები, პალიტრა, რომლის საშუალებით შესაძლებელია, შენი გემოვნებით შექმნა „შენი თბილისი“, სახლები ერთმანეთს ემაგრება და ერთიანობაში ქუჩას ემსგავსება. „ახალი თბილისს“ შეიძლება, ჰქონდეს როგორც დეკორაციული დატვირთვა, აგრეთვე, კომფორტული რეკვიზიტია სხვადასხვა თამაშის დროს, მაგალითად, მანქანების გადაადგილება ახალი თბილისის ჭიშკრებში, თოჯინების სახლის ფუნქციით გამოყენება და სხვა.
ძალიან მიხარია, როდესაც მეუბნებიან, რომ ჩემი შექმნილი სათამაშოები მოსწონთ, რომ ერთობიან და დაუვიწყარ შრთაბეჭდილებებს იღებენ პატარები.
მე არ ვწყვეტ ახალ სათამაშოებზე ფიქრს და მათ შექმნაზე მუშაობას.
