ჩვენ არაერთი ნამუშევარი გვინახავს, რომელიც ხელოვნების სხვადასხვა მიმდინარეობას ეკუთვნის. ზოგიერთი მათგანი ერთმანეთს ჰგავს, ზოგიც აშკარად გამორჩეულია. ხელოვანი, რომელზეც ახლა გიამბობთ, ნამუშევრებს ლენტებით ქმნის. ცხადია, შექმნის პროცესი შრომატევადია, თუმცა, იმის გამო, რომ ნინო მოლაშვილისთვის შედეგი გაცილებით მნიშვნელოვანია, მუშაობაც სასიამოვნო და საინტერესოა.
ნინომ აღნიშნული მიმართულებით ქარგვის შესწავლა დამოუკიდებლად დაიწყო. მაგრამ ფაქტია – სურვილმა და მონდომებამ გაამართლა და დღეს მისი ნამუშევრები არაერთ გარემოს ალამაზებს.
ლენტებით ქარგავთ – რამ განაპირობა თქვენი ინტერესი?
ლენტებით ქარგვით 5 წლის წინ დავინტერესდი, ერთერთ ჯგუფში ვნახე რამდენიმე ქალბატონის ნამუშევრები, მომეწონა და მეც გადავწყვიტე, მომექარგა და მგონი, გამომივიდა კიდეც.
შესაბამისი ცოდნა როგორ მიიღეთ?
თავიდან დამოუკიდებლად დავიწყე, შევიძინე პრინტები და მოვქარგე, მის მერე აღარც გავჩერებულვარ, შენით ბევრ რამეს სწავლობ და იხვეწები.
პროცესი გარკვეულ სირთულეებთან არის დაკავშირებული. სურათს გააჩნია, ზოგი მალე იქარგება, ზოგს დრო სჭირდება, რა თქმა უნდა, სირთულეებიც არის, მაგრამ საბოლოოდ შედეგს იღებ.
ხელოვნების ამ მიმდინარეობას რის გამო გამოარჩევთ?
ძალიან მომწონს, როცა ლენტებით ვქარგავ, საინტერესო პროცესია, შრომატევადიც არის, ინტერესიც დიდია და მოთხოვნაც. ბევრ ოჯახშია ჩემი ნამუშევრები, ეს ჩემთვის დიდი ბედნიერებაა, მიხარია, რომ მოსწონთ და აფასებენ ჩემს შემოქმედებას, ბევრ თბილ სიტყვას მწერენ, რაც სტიმულს მაძლევს, რომ გავაგრძელო ჩემი შემოქმედება.
სხვა დარგებით თუ ხართ დაინტერესებული?
ბავშვობიდან ვქსოვდი, ჯვარედინი ქარგვით ვქარგავდი, გობელინითაც დავინტერესდი და თექითაც, მაგრამ ყველაზე მეტად ლენტებით ქარგვამ გამიტაცა. ყველაზე დიდი მოწონება სწორედ ამან დაიმსახურა.
